БЕОҐРАД – Владa Републики Сербиї усвоєла вчера, 20. децембра заключенє зоз хторим обовязала Министерство просвити же би ше перше полрочє у шицких основних и стреднїх школох на териториї Републики Сербиї закончело на пондзелок 23. децембра и же би жимски розпуст почал на вовторок, 24. децембра, стої у сообщеню на сайту Министерства просвити.
Друге полрочє почнє на пондзелок 20. януара 2025. року у шицких школох у Сербиї, та и у школох у АП Войводини.
З тей нагоди, Министерство просвити послало допис до школох у хторим ше наводзи же школярови хтори ма можлївосци и виражи жаданє поправиц оцену треба оможлївиц одвитовац и поправиц оцену на концу першого полрочя школского 2024/2025. рока.
Школом ше препоручело же би ше по 27. децембер закончело зоз шицкима активносцами и подзелєло школски кнїжочки. Тиж по исти термин будзе орґанизоване и предлужене пребуванє, окрем у школох на териториї АП Войводини дзе уж зоз Календаром образовно-воспитней роботи плановане же розпуст почнє 24. децембра. Препоручене и же би ше анкетовало родичох и на основу анкетованя орґанизовало роботу предлуженого пребуваня.
Тота одлука принєшена з цильом очуваня наставного процесу як и интересох и правох школярох на образованє, гвари ше у сообщеню Министерства просвити.