ТОМЕТИНЕ ПОЛЬО – У Тометиним полю, населєню у општини Пожеґа у Златиборским округу, 28. и 29. марца отримана вежба ратованя наволана „Лесник 2026”, хтору орґанизовало Добродзечне дружтво Пожеґа, а участвовали и члени добродзечних огньогасних дружтвох зоз Руского Керестура, Будисави и Пранянох.
Вежба була унапрямена на глєданє и ратованє нєстатей особи, а окремни акцент положени на системи препатрунку терена, формованє тимох, одредзованє секторох глєданя, як и на ефикасну комуникацию медзи учашнїками.
Зоз Руского Керестура на вежби участвовали шесцеро огньогасци. Заменїк предсидателя Добродзечного огньогасного дружтва Руски Керестур Елемир Надь визначел же за нїх таки вежби барз значни и же ше на нїх дзечнє одволую.
