НОВИ САД – Од 16. по 21. май будзе отримани 93. Медзинародни польопривредни саям, найважнєйша аґробизнис смотра у Юговосточней Европи, на хторим ше представя вецей як 1200 викладаче зоз Сербиї и зоз коло 40 жемох.
Держава партнер будзе република Ческа хтора представи иновативни ришеня у польопривреди.
На нєдавней конференциї за новинарох ґенерални директор Новосадского сайма Слободан Цветкович гварел же нащивителє годни опатриц виставу польопривредней механїзациї, найсучаснєйшей провадзацей опреми и резервних часцох.
Фокус тогорочного сайму на штучней интелиґенциї, диґитализациї, нових технолоґийох, на желєних инициятивох и безпечносци поживи з окремну увагу на младих у аґрару и на медзинародним сотруднїцтве.
Роботни час сайма будзе од 9 по 19 годзин, цена єдней уходнїци 1.000 динари, за колективни нащиви – 750 динари, а за орґанизовани нащиви школох и факултетох, як и за дзеци од 7 по 14 роки, алє и за пензионерох, карта будзе коштац 500 динари.
На Фамелийни дзень, 16. мая цала фамелия зоз дзецми по 14 роки годна войсц на саям з єдну уходнїцу хтора кошта 1.000 динари.