НОВИ САД – У Заводу за културу войводянских Руснацох пияток, 19. юния, отримана осма порядна схадзка Одбору за службене хаснованє язика и писма.
Схадзку водзел предсидатель того Одбору, проф. др Михайло Фейса, та на початку, после прилапйованя Записнїка зоз предходней схадзки, начишлєл членом шицки свойо активносци медзи двома схадзками.
На схадзки було и слова о початку виробку правного и фармаколоґийного словнїка, а уж виказана и инициятива же би ше пририхтало и хемийски, ґеоґрафски и психолоґийни словнїк.
Значне и же члени Одбору вибрали дизайн котри ше будзе хасновац у периодзе уписованя до Окремного виберацкого списку (ОВС) пред наиходзацима єшеньскима виберанками за нове зволанє Националного совиту Руснацох. На скорей розписани конкурс сцигли два роботи – Дарка Заґорца и Срдяна Ґовлю, а после гласаня вибрани дизайн Срдяна Ґовлю, з тим ше же го ище дакус присподоби младшим ґенерацийом.
Предсидатель Одбору проф. Фейса потолковал як ше одвива робота на писаню новей Националней стратеґиї Руснацох, яки активносци пребера тот Одбор и потолковал членом крочаї потребни же би ше нову Стратеґию принєсло на єшень.
