РУСКИ КЕРЕСТУР – У орґанизациї ЗСР Коляк внєдзелю, 22. юния на новей писти було орґанизоване змаганє у спортским риболову на дуґов.
На тим змаганю участвовали 17 учашнїки, а право змаганя мали лєм члени и пионире З.С.Р. Коляк зоз Руского Керестура. Тото змаганє було и интернационалного харатеру, понеже ше змагала и фамелия Бучкових зоз Миклушевцох (Р. Горватска).
Перше место завжал Желько Булатович, хтори лапел 2.000 кили риби, друге место освоєл Владо Ґовля, хтори лапел 1.145 килоґрами, док треце место припадло Юлинови Винайови, хтори лапел 1.050 килоґрами.
Подзекованє тиж достал и наймладши учашнїк на змаганю, Павле Михайлович, хторому придата диплома.
Окремне подзекованє достал Владко Рацпети за спонзорство и помоц у роботи Спортского здруженя, як и судия Стево Сабо, а тиж и Дарко Чернок за шицку помоц коло змаганя, пририхтованя писти и закладаня за Здруженє.
После законченого змаганя у спортским риболову на дуґов, преглашованє побиднїкох було у рибарских просторийох на шлайзу, дзе ше друженє предлужело зоз єдлом навареним у котлу, хтори приготовел Владо Горняк.
Орґанизатор того змаганя було Здруженє спортских рибарох Коляк зоз Руского Керестура.
