РУСКИ КЕРЕСТУР – Другого дня 65. Фестивала рускей култури Червена ружа, всоботу, 27. юния отримана музична програма за дзеци, Червене пупче, на хторим того року були приявени осем нови композициї.
З тей нагоди, награду за найлєпши текст достал Михайло Хома з Руского Керестура, за шпиванку Чаривни швет, за хтору музику зложела Марина Роман, а вишпивали ю – Аня Арва, Зара Будински, Елена Варґа и Заря Ковач, док награду за найлєшу композицию на тогорочним Червеним пупчу достала шпиванка Злога, авторки Марини Роман, за хтору текст зложел Владимир Дудаш, а интерпретовали ю – Олеґ Катона, Андрей Надя и Тияна Малацко.
Другу награду за композицию достала шпиванка Моя баба, авторки Санї Дивлякович зоз Коцура, за хтору слова написала Ванеса Няради, а oдшпивала ю Калина Тимко, док трецу награду за композицию достали млади авторки Михаела и Сара Малацково з Руского Керестура, за шпиванку Наш одпочивок, хтори и одшпивали шпиванку, док им коло писаня словох помогли и Лара и Стефани Рац.
Задаток оценїц нови композициї и уручиц награди мал фахови жири у чиїм составе того року були – Мая Зазуляк Гарди, Наташа Колесар, Михайло Бодянец и Таня Орсаґ.
Попри наградзених, на Пупчу шпивали и – Даниєл Винаї, Марко Еделински, Даниєла Рамач и Надя Варґа, потим Катарина Медєши, Ленка Емедї, Кристина Гарвильчак, Лина Папуґа и Кристина Рамач, а окрем солистох, на бини Школи Петро Кузмяк, шпивачох провадзел и дзецински хор Шкорванчки. Його музични руководительки Кристина Афич и Татяна Фейди, а хтора руководителька и Музичней оводи, док аранжмани за шицки шпиванки написал Мирослав Пап. Дзеци Музичней оводи на гармоники провадзел Стефан Колошняї, а у пририхтованю помогли и Аня Арва и Стефани Рац.
У ревиялней часц, наступел Пупчов бенд, у чиїм составе були – Михаела Брекайло на буґнох, Адела Мецек на бас ґитари, Кристина Русковски на клавиру, а на ґитари Сашо Палєнкаш, хтори и порихтал бенд и присподобел аранжмани за шицки шпиванки.
У пейцох точкох, а зоз обробками познатих забавних шпиванкох, наступели – Мирослав Бесерминї зоз Коцура, Ана Мария Сопка, Доротеа Рамач и Милена Рамач. Шицки пейц шпиванки позберала и пририхтала Кристина Афич, хтора и пририхтала шпивачох и провадзаци вокали, а Кристина була и музична руководителька цалого Пупча.
У составе провадзацих вокалох Пупчового бенду були – Корина Будински, Лена Зелич, Адрияна Штранґар, Хана Будински, Ана-Мария Сопка, Доротеа Рамач и Милена Рамач.
У першей часци Пупча патрачох през програму водзели и забавяли Надя Станкович и Ена Сабадош, док у ревиялней часци програму водзела Мая Надь.
