РУСКИ КЕРЕСТУР – У керестурскей амбуланти, всоботу 26. септембра, Дом здравя Кула орґанизовал безплатни превентивни препатрунки.
На препатрунок ше одволали коло 30 валалчанє, хтори могли окончиц контролу цукру у креви, вимерац кревов прицисок, одредзиц индекс тїлесней маси (БМИ), окончиц ЕКҐ препатрунок, як и препатрунок лїкара общей пракси и кардиолоґа.
Єден зоз дохторох хтори всоботу препатрал пациєнтох у Руским Керестуре були и директор Дома здравя Кула др Блаґоє Маркович, хтори за Рутенпрес визначел же є задовольни зоз одволаньом, окреме кед ше вежнє до огляду же у валалє хвильково актуални роботи на полю и коло паприґи, та нє шицки могли присц. Вон гварел же ше на початку октобра у Дому здравя у Кули планує отвориц Совитовалїще за диябетес и затитосц, та прето и акцент тей акциї бул на контроли високого прициску, цукровей хороти и ЕКҐ, цо хороти хтори иду єдна зоз другу. Додал же праве того дня даскельо пациєнти послати на дальше випитованє пре високи прицисок и прейґмирну чежину, цо лєм потвердзело значносц превентивних препатрункох.