КУЛА – Гражданє Кули ше пияток, 25. септембра, позберали опрез Полицийней станїци потим як загарештовани З.С. (56), пре сумню же зоз шекеру поламал штанд Сербскей напредней странки у Кули и же зоз пориском вдерел єдного активисту.
На протест опрез Полицийней станїци поволала нєформална и нєзависна инициятива младих зоз општини Кула „Млади Кула”, наводзаци же полиция у прешлим чаше нє поступала спрам тих хтори тарґетовали активистох хтори потримую студентох, твердзаци же загарештовани длуго бул злохасновани и застрашовани.
Як визначел Димитриє Симич спред „Млади Кула”, придати вецей як 100 прияви пре писанє ґрафитох по хижох студентох и їх активистох, диґиталне насилство, преволованя зоз фалшивих профилох на дружтвених мрежох и гроженя зоз шмерцу, медзитим, як гварел, полиция нє порушала анї єден поступок. По його словох, циль того сходу бул нє лєм потримовка З.С., алє и же би ше послало порученє полициї и гражданом же нє шме буц селективней правди и селективного поступаня, а тиж апеловане и на полицию же би защицела шицких.
Най здогаднєме, припаднїки МУП-у загарештовали З.С. зоз Кули под сумню же окончел виновни дїла насилне справованє, загрожованє безпечносци, лєгке тїлесне покалїченє и знїщенє и очкодованє цудзей ствари. Як сообщел МУП, вон под сумню и же виписал ґрафити зоз уквилююцим змистом на службених превозкох Скупштини општини Кула и грожаце порученє на хижи предсидателя Општинского одбору СНС у Кули.