РУСКИ КЕРЕСТУР – Традиция отримованя Пасулїяди у орґанизациї Рукометного клубу Русин предлужела ше и того року. По другираз є отримана всоботу, 28. септембра на керестурским базену, а участвовали 11 екипи.
По думаню фахового жирия, хтори творели Керестурец Михайло Костелник и Даниєл Фаркаш зоз Кули, найлєпшу пасулю на тим змаганю уварела домашня екипа хтора представяла фирму Luxor Furniture, а у чиїм составе були – Себастиян Планчак, главни кухар, потим Денис Терек, Тони Костелник, Деян Будински, Стефан Горняк, Иґор Надь, Деян Горняк, Оксана и Боян Тереково и Мирослав Павлинї зоз Лалитю.
За награду побиднїки достали котлїк и пице, 2. место наградзене зоз пакетом пива и погаром, а екипа хтора завжала 3. место достала погар, пакет пива и пакет соку.
Пасулю ше почало вариц коло 14 годзин, варенє тирвало по 18 годзин кед екипи придавали прикладнїки пасулї жирию же би их оценєл, а потим одредзел побиднїкох.
Пасулю хтору наварели учашнїки могло и купиц, а порция коштала 300 динари. Як спомли орґанизаторе, по 18 годзин скоро шицка пасуля уж була розпредата.
Купиц могло и пице хторе обезпечели орґанизаторе, а заробени пенєж зоз тей манифестациї, орґанизаторе, як и потераз, вихасную за трошки свойого рукометного клубу.
