РУСКИ КЕРЕСТУР – На чарди Лонґов, внєдзелю 27. септембра, треца ґенерация Ґимназиї „Жарко Зренянин”, оддзелєнє у Руским Керестуре, преславела 50 роки матури.
До IVб оддзелєня Ґимназиї на руским язику од 1972. по 1976. рок ходзели школяре народзени 1957. року, матуровали 27 школяре зоз хторих ше у медзичаше, нажаль, осмеро упокоєли, а на преслави були присутни тринацецеро. Класни им два роки бул Яков Кишюгас а два роки Владимир Бесерминї. У тей ґенерациї найвецей було школярох зоз Керестура, алє и Коцура, Нового Орахова и Сримскей Каменїци.
Як за Рутенпрес виявел Михайло Бодянец, на стретнуцу було барз приємно, шицки ше зрадовали своїм товаришом зоз школских лавкох, наприповедали ше и здогадли анеґдотох зоз школских дньох, а велї ше здогадую и даяких дробнїцох аж и после 50 рокох. Тиж так ше здогадли и на своїх товаришох хтори нєшка жию у Канади, Лондону и Горватскей. Окреме интересантне же зоз тей класи настали аж и два малженства.
За конєц мали и єдно окремне нєсподзиванє, торту хторей ше шицки зрадовали, а на розходзе спадла тварда догварка же ше нєурядово буду сходзиц кажди рок хто годзен, а на кажди пейц роки присуство на означованю матури обовязне.
