БЕОҐРАД – Як стої на урядовим сайту Републичней виберанковей комисиї, на позарядових парламентарних виберанкох затераз буду участвовац 12 лїстини.
У медзичаше, лїстина котра була преглашена под числом 9 „Вибор народа – Мирослав Мики Алексич – Милош Парандилович – Александар Йованоч Чута (Народни рух Сербиї, Нова твар Сербиї, Рух еколоґийне повстанє)”, хтору поднєсла Коалиция Народна Сербия поцагла кандидатуру и обявели же потримую Студентску лїстину под числом 3.
РВК констатовалa вимогу, висцералa тоту лїстину, та ше по тоту хвильку преглашени лїстини после тей, поцагли горе за по єдно место. Под числом 9 тераз на гласацких лїсткох будзе лїстина „Европска Сербия – Мариника Тепич – Здравко Понош (Странка шлєбоди и правди, Сербия центер – СРЦЕ, Солидарносц – Самоохрана – Ошлєбодзенє)”, хтору придала Коалиция Европска Сербия зоз 250 кандидатами за народних посланїкох, а под числом 10 будзе лїстина „СДА Санджаку – Чуваре Санджаку”, хтору придала Странка демократскей акциї Санджаку, як меншинску лїстину зоз 35 кандидатами за народних посланїкох.
Под числом 11 на гласацким лїстку будзе лїстина „Боґолюб Карич – Рух моц Сербиї – БК”, хтору придал Рух Моц Сербиї – БК, зоз 250 кандидатами за народних посланїкох.
Под числом 12. преглашена виберанкова лїстина „Чале тото за тебе – Петар Дюрич – премиєр Сербиї”, хтору придала Ґрупа гражданох Чале тото за тебе – Петар Дюрич – премиєр Сербиї, а на лїстини єст 9 кандидатох за народних посланїкох. У медзичаше, РВК на схадзки 30. септембра понїщела ришенє о преглашеню тей лїстини пре сумню же лїстина нє ма достаточне число подписох потримовки а представнїком дати 48 годзини же би виправели нєдостатки.