РУСКИ КЕРЕСТУР – Дзевецеро школяре шестей, седмей и осмей класи зоз штирох школох зоз Шведскей, у провадзеню своїх наставнїкох и координаторох, того тижня пребуваю у Основней и штреднєй школи зоз домом школярох Петро Кузмяк у Руским Керестуре, а у рамикох Ерасмус+ проєкту мобилносци школярох.
Под час пейцодньовей нащиви, од пондзелку 28. септембра по пияток 2. октобра, шведски и керестурски школяре, през заєднїцки годзини и роботнї, обрабяю теми отримуюцого розвою, зоз окремним акцентом на еколоґию, алє и на сотруднїцтво и упознаванє тих двох образовних штредкох.
За заєднїцки активносци вибрани и представнїки школярох керестурскей школи, хтори зоз госцами зоз Шведскей участвую у рижних роботньох и задаткох, а главна координаторка проєкту, спред школи Петро Кузмяк, Лїляна Рудакиєвич.
Од початку їх приходу, орґанзизовани активносци у хторих ше школяре упознавали, нащивели Кулу дзе по предавальньох глєдали продукти и амбалажу зоз еколоґийнима ознаками, после чого отримали и презентацию о тим цо виглєдали и научели.
По конєц тижня у плану и роботнї о условийох хтори потребни за хованє рижних рошлїнох на тим подручу, школяре нащивя польорпивредне ґаздовство и рибалов у Руским Керестуре, отримаю и заєднїцку шветочну вечеру, та з тей нагоди шведкси школяре пририхтаю традицийни єдла своєй держави, док домшанї представя свою кухню. Школяре остатнього дня, на пияток, буду мац и орґанизовани вилєт до Беоґраду дзе нащивя Авалску турню и Калемеґдан, а потим пойду и на приєм до Амбасади Швесдкей.
Окремна часц проєкту будзе предлуженє сотруднїцтва после законченей нащиви, прейґ платформи eTwinning – европскей онлайн платформи хтора оможлївює школяром и наставнїком, зоз рижних жемох, вєдно реализовац образовни проєкти и черац искуства. Школяре прейґ тей платформи вєдно буду креировац отримуюци город у бависку Minecraft, зоз чим на креативни способ, а през бависко, укажу як розумели поняце отримуюцого розвою и так годни применїц знанє здобуте под час проєкту.
