ВЕРБАС – У Подобовей ґалериї Културного центру Вербас стреду вечар, 30. септембра, отворена самостойна вистава єдного зоз наших найвизначнєйших творительох – уметнїка Силвестера Макая зоз Коцура.
Як визначене при отвераню вистави, котра облапя вецей як 50 подобово слики, фотоґрафиї и скулптури, Макаї припада ґенерациї уметнїкох котри означели розвой сучасней уметносци войводянских Руснацох, а його творчосц представя важну часц културного нашлїдства тих просторох.
Присутних з тей нагоди привитала руководителька Подобовей ґалериї др Силвия Єлачич, а о Макайовей дїялносци, опусу и вплїву на младши ґенерациї понеже, як гварела, охабел глїбоки шлїд и як подобови педаґоґ, бешедовала историчарка уметносци Єлена Перкович.
Часц своєй творчей енерґиї Силвестер Макаї пошвецел и литератури, а о його кнїжкох и писаних словох того вечара бешедовал поета, писатель прози и есеїст, литературни, театрални и подобови критичар Давид Кецман Дако.
Макаї член Здруженя подобових уметнїкох општини Вербас и Здруженя писательох при Матици Сербскей у Новим Садзе, як и Здруженя подобових педаґоґох Войводини. Видал вецей кнїжки, участвовал на числених колективних виставох у жеми и иножемстве, добитнїк є велького числа наградох и припознаньох.
Уметнїк Силвестер Макаї подзековал шицким присутним, як и членом своєй фамелиї, же возвелїчали тоту значну подїю за ньго, самостойну виставу з нагоди 85. рочнїци його народзеня.
Заинтересовани годни уживац у Макайових дїлох по 17. октобер, покля вистава будзе виложена у Подобовей ґалериї у Вербаше.
