Au pair нагода збогациц власне искуство

автор сас
1.4k Опатрене

Нашо млади часто у нєзавидиним положеню. Законча школу, жадаю робиц и усовершовац ше у роботи котру любя, алє им ше таке у нашей держави углавним нє понука. Условия за занятосц чежко мож сполнїц, та млади одходза робиц за гранїцу. У такей позициї була и Катарина Кочиш зоз Дюрдьова. Преламала, виборела ше, и унапрямела ше ґу новому виволаню.

Пошвидко после Стреднєй економскей школи робела як приправнїк у Новим Садзе, алє єй контракт нє предлужели. Була розчарована, бо сцела робиц, и нє одуставала од того же ше дачому треба пошвециц источасно и на власним идентитету. Одлучела нащивиц нину у Нємецкей, у Дахау котра ю на вецей заводи волала до нєй.

– На Нємецкей телевизиї зме видзели Au pair. Першираз сом за таке чула, а нина ми предложела же би сом могла тото пробовац – гварела Катарина. Кед ше врацела до Дюрдьова, пошвидко нащивела и Нови Сад котри потеди за ню бул прекрасни город. Почала обачовац вельку розлику у ушореносци городох.

И ознова ше прешвечела же младим чежко на

йсц роботу. Одлучела ше фокусовац на Au pair програму котра нє понука заробок, алє збогацованє искуства и знанє язика. Почала ше информовац и зберац документацию.

НЄ МОЖЕ КАЖДЕ БУЦ У ПРОГРАМИ

 Au pair програма запровадзена у вецей державох Европи. То французке слово – на истим уровю, єднаки. У програми можу участвовац млади медзи 18 и 29 роки зоз знаньом основного уровня язика жеми дзе жадаю пребувац. Млади по тей програми жию у фамелиї у котрей маю окремну хижу и купатило, костиранє, а домашнї длужни обезпечиц дакус пенєжи за трошок, курс язика и нагоду упознац националну културу и околїско. Муши мац вожацку дозволу за авто, искуство коло чуваня дзецох и буц шорови граждан. Млади длужни водзиц рахунку о дзецох у тей фамелиї дзе пребуваю, чувац их, алє с

у нє обовязни робиц физични роботи – рихтац им єдзенє, райбац и подобне. Правилох ше нє притримую шицки, о чим шведочи Катарина.

О рок позберала шицки потребни документи, а пошвидко початком 2012. року пошла до Илтену у Нємецкей на рок. Була у фамелиї Мецлер дзе чувала три дзивчатка. Дзень єй бул виполнєти, бо сцела закончиц висши курс, а кажди викенд ю фамелия одводзела на рижни места, опатрац городи, музеї и на пикники.

– Була сом як член фамелиї, цо и задумка тей програми, мала сом свой приватни простор и чувала сом дзеци. Вони мнє упознали зоз свою, а я их зоз мою културу. Таки були любезни же зме славели обидва Крачуни. У децембру и наш у януару. Теди сом им порихтала єдла яки ше при Руснацох рихта на Вилїю – гварела Катарина.

З фамелию ше порадзела о розпорядку обовязкох дзецох, кеди цо маю окончиц и того ше тримала. Ставала на 7 годзин, дзивчата облєкала мац, Катарина порихтала фриштик котри вєдно єдли и одвезла дзеци на авту до школи. Такой предлужела на курс язика. На 13 годзин, такой з курса ишла по дзеци, рихтала им ужину, потим дзеци робели домашнї задатки, а после того ше бавели.

На 20 годзин дзеци мушели лєгнуц спац, а медзи 20 и 21 годзин родичи ше врацали дому з роботи. 

– Було ми барз чудне же ше дзеци и родичи видза и дружа лєм за викенд, бо иншак нє сцигую. Теди ми було кущик напарте, алє сом жадала ище лєпше научиц язик, та сом так мушела. Робиц з дзецми крашнє, алє и вичерпне. Кед сом закончела курс мала сом вецей шлєбодного часу – гварела Катарина.

ПОВЯЗАНИ ТЕКСТИ