НОВИ САД – У 23. колу Подручней фодбалскей лиґи Нови Сад, хторе одбавене 30. априла, фодбалере ФК Бачка 1923 зоз Дюрдьова страцели у стретнуцу зоз фодбалерами Червеней Гвизди з Нового Саду, зоз резултатом 4:3.
Стретнуце нє почало обецуюцо анї за домашнїх, анї за госцох. Обидва екипи мали даскельо добри нагоди дац ґол такой на початку стретнуца, алє их нє вихасновали. Пейц минути пред конєц першого полчасу, у 40. минути, домашнї дали свой перши ґол.
У другим полчаше фодбалере Червеней Гвизди бавели ище лєпше и посцигли и други ґол у 47. минути, а нєодлуга у 56. и 58. минути, ище два. Теди ше уж могло нагаднуц хто будзе побиднїк на тим стретнуцу.
Но, пред конєц стретнуца дюрдьовски фодбалере ше ,,пребудзели”, та у 70. минути Стефан Тривунович копнул до лабди и вона закончела у процивнїцким ґолу. Милан Роґич свою схопносц на терену указал и на тим стретнуцу и за Бачку посцигнул ище два ґоли, у 75. и 84. минути, алє то на жаль нє було досц же би дюрдьовчанє були побиднїки.
После того кола Бачка ище вше на пиятим месце зоз штерацец єдним бодом. У шлїдуюцим колу дюрдьовски фодбалере на домашнїм терену привитаю фодбалерох зоз Кисачу.