НОВИ САД– Часопис за науку, литературу, културу и уметносц „Шветлосц” за 2022–2023. рок награду „Микола М. Кочиш” додзелї др Ани Римар Симунович.
У обгрунтованю за награду одвичательного редактора часописа „Шветлосц” Миколи М. Цапа, Римар Симунович наградзена за найлєпше авторске дїло – Мац Жем у литературней творчосци Штефана Гудака у контексту предлужованя поетики Михайла Ковача, а тиж и за активносц у редакциї часописа „Шветлосц” и окремне доприношенє у науки, литератури, култури и уметносци по руски.
Порядна, дворочна награда вонкашнєй сотруднїци часописа „Шветлосц” будзе уручена на штварток, 15. юния, з нагоди Дня НВУ „Руске слово” у Новим Садзе. Награду у форми дипломи и пенєжней суми на интерним стретнуцу уруча одвичательни редактор часописа и директор установи.