На концу свойого другого директорского мандату (2018–2026), шор би було явно подцагнуц смужку, без намири ше хвалїц. Написац цо зробене, кед у питаню окремни досяги, а нє порядни каждодньово обовязки директора
Врацени длуства и поглєдованя котри були вецей як два милиони динари. НВУ „Рускe словo” у Новим Садзе 2020. преселєна до своїх просторийох (на Футожскей 2), а зоз тим за рок зашпоровани 1,5 милиони динари и 2021. купени нови авто (Фиат Типо седан). Фактично купени два нови авта, бо ше нам нєодлуга случело транспортне нєщесце и зоз надополнєня осиґураня купени Фиат Панда. У седем рокох занятим дзешец раз подзвигнути плаци, алє су нєвельки, лапаю медиялни заробок и просек и Сербиї, медзи 100.000 и 170.000 дин. (нето), значи нєт вельки розлики медзи плацами занятих у фирми. Патрене и так и же би плаци у НВУ „Рускe словo” були на уровню Радио-телевизиї Войводини, Заводу за културу войводянских Руснацох, Националного совиту Руснацох и других руских институцийох.
Нови маркетинґ у НВУ „Рускe словo” почал давац резултати, та после трох деценийох траценя нєрухомосцох, тей яри у Руским Керестуре купена хижа, бувши дутян у центру, дзе будзе редакция, кнїжкарня и промотивне место. То перши простор Установи купени зоз власних средствох, котри назберани дзекуюци колективу и донацийом наших читачох и добротворох.
Простор НВУ „Рускe словo” у старей друкарнї у Керестуре леґализовани и порихтани проєкти за його реновиранє до канцеларийох, архиви и маґазину. Прешлого року реструктурована НВУ „Рускe словo” и формовани два основни роботни єдинки и редакциї з администрациями у Новим Садзе и Руским Керестуре.
Прейґ нового маркетинґу, за осем роки видати вецей як 100 кнїжки (од того вецей як трецина за дзеци), предати коло 16000 кнїжки (2018–2026). НВУ „Рускe словo” здрава и ликвидна, зоз динарску резерву скоро два бруто плаци за 24 занятих (за потреби проєктох, средствох амортизациї и поточних потребох).
Створена моцна социялна програма за занятих (солидарна помоц, пакецики за дзеци, старанє о мацерох, єднакосц полох, виплацованєза дзень фирми, виплацованє за конєц рока, мобилни телефони ше обнавя кажди два роки, ювилейни награди на кажду децению).
Змоцнєни спонзорски и донаторски инвестциї за видавательство кнїжкох, поєдинци зоз Сербиї и Заходней Европи (А. Ковач, Ш. Гемерле и други) и Сиверней Америки и Австралиї (Ю. Сабадош, В. Рускаї, А. Феирбанкс, С. Олеяр, Р. Джуджар и други) донирали скоро три милиони динари (у рижних валутох). Порушане скоро стаємне колективне зберанє средствох за руски кнїжки прейґ интернету (краудфандинґ).
Створена „седма дїялносц” Установи – Документацийни центер НВУ „Рускe словo” у Новим Садзе и Руским Керестуре. „Шветлосц” постала наукови часопис, а участвовали зме у писаню Медийней стратеґиї Републики Сербиї. НВУ „Рускe словo” и Национални совит Руснацох перши у Републики Сербиї подписали Интерни етични медийни кодекс, а наша Установа участвовала у писаню Закона о информованю Републики Сербиї. Тераз зме зоз ОЕБС-ом ношителє потримовки процесу медийней самореґулациї у Републики Сербиї.
Уведзени рочни Явни конкурс видавательства кнїжкох и зреализовани перши векши медзинародни проєкт медзи Руснацами у Саскачевану и Войводини – кнїжка „Саскачеван мой други дом”. Ту и капитални национални руски виданя – „Мацерова руска кухарка” по руски и сербски, як и наслови з рускей етноґрафиї и историї, чийо тиражи кнїжкох розпредати.
Ушорена система традицийного наградзованя за творчосц вонкашнїм сотруднїком и занятим у НВУ „Рускe словo”, уведзена нова награда „Михайло Ковач” Часописа за дзеци „Заградка”. Консолидовани едициї Видавательней дїялносци НВУ „Рускe словo” и уведзена нова едиция сликовнїцох за дзеци „Заградка”.
Цалком пременєни визуални идентитет виданьох, Установи и редизайновани лоґои НВУ „Рускe словo” (дизайнер Иґор Орсаґ). З нагоди ювилейох и рочнїцох створена вистава заглавйох, насловних бокох и лоґоох – „Вик як клїпнуце” (плакати по руски, каталоґ по сербски и анґлийски). Но, и велї други проєкти, окреме виданьох за дзеци.
Людзе, донаторе и спонзоре нам верели и дзечнє финансийно потримовали НВУ „Руске слово”. Фирму сом водзел як власне обисце, рационално и скромно. Як директор, ношел сом зоз шицкима занятима шкатули и пораєл просториї. Плацу сом себе анї раз самоинициятивно нє подзвигнул, окрем кед є шицким линеарно звекшована. Репрезентацию зме трошели шицки вєдно, лєм зоз важнєйших нагодох и преславох.