Drum and Bass треба знац слухац

автор А. ПАПУҐА
1.2k Опатрене

Музична орґанизация Drop Sensei зоз Нового Саду иснує три и пол роки. Промовую drum and bass музику, а їх музични збуваня, ткв. „евенти” познатши як Шуренє. Єдни зоз сновательох тей орґанизациї праве новосадски диджейове и промотере drum and bass музики Бранимир Боянович, познати як Бозне и Борис Ройко познати як Рокстер, обидвоме зоз Руского Керестура.

 Drop Sensei орґанизация основана 24. марца 2012. року, а по нєшка орґанизовали вецей як 50 „евенти”. На їх збуваньох госцовали коло 20 домашнї и странски познати продуценти и диджейове.

– И скорей було орґанизациї хтори промововали drum and bass музику, алє нє и тот жанр хтори ше ми намагаме приблїжиц ґу цо ширшому кругу людзох. Людзом треба оможлївиц вибор, велї анї нє чули за тоту музику, алє су примушени слухац лєм тото цо популарне, тото цо им надрилєне. Drum and bass длуго бул „underground”, скрити и нєпознати – толкую Бозне и Рокстер.

„МАЙСТРОВЕ ДРОПА”

Нєурядово почали робиц 2011. року, кед отримали першу Шуренє журку. Медзитим, сама идея и початки водза аж до штредньошколских дньох. Почали з нєвелькима наступами у Руским Керестуре, а кед пришли до Нового Саду студирац, предлужели отримовац журки.

– Наступали зме на менших журкох, у рижних клубох, як и у Матки, тедишнїм РКПД, на маскенбалох, лєбо даяких других журкох. Теди зме нє були таки популарни, та то нє були вельки наступи, углавним за 50 людзох. Гоч зме уж були у Новим Садзе, приходзели зме и до Керестура на „Дньовку”, „Водова фест” и подобни збуваня – здогадує ше Бозне и предлужує:

– Можем повесц же сом самоуки диджей, сам сом ше научел миксовац писнї, а Бориса сом од 2010. року поступнє уводзел до тей роботи. Трецого члена, Лехела Папачека, зме упознали прейґ форумох за промовованє drum and bass музики хтори зме поряднє провадзели. Анґажовали зме го же би дизайновал плакати за нашо „евенти” и так почало нашо сотруднїцтво. Мали зме ище дзепоєдних членох, медзитим, затримали ше лєм ми троме и асистентки Оливера Алич и Єлена Шобич – гвари вон.

Назву орґанизациї лєгко здумали. Кед два писнї починаю зоз кулминацию источашнє, хвильку кед ше поклопя у миксованю ше у музичним жарґону наволує drop. Понеже нє лєгко потрафиц тоту хвильку, слово sensei (карате майстор) наглашує же вони „Майстрове дропу”. Назва „евентох” Шуренє, понеже их тото слово, як гваря, здогадує на атмосферу на їх збуваньох, кед випатра як кед би шицко горело, бовчало.

Promo Fotka 4

ВЕКША ПОПУЛАРНОСЦ – ВЕКША ОДВИЧАТЕЛЬНОСЦ

Перши Шуренє журки орґанизовали у дакедишнїм новосадским клубу „Компресор”, дзе могло стануц коло 300 людзох. Приходзели вше вецей людзе, та о два роки мушели найсц векши простор.

– Як зме почали приводзиц странских продуцентох, интересованє за нашо „евенти” поставало вше векше, а ми вше познатши. Нєодлуга нам  „Компресор” бул мали, та зме ше преселєли до СКЦ (Студентски културни центер) „Фабрика”, дзе капацитет од 500 до 1000 людзох – толкує Рокстер.

Затераз им простор у „Фабрики” достаточни, медзитим пияти родзени дзень, 2017. року, планую дочекац у малей сали на новосадским Спенсу, дзе може стануц 3 000 людзох.

Отримую „евенти” просеково раз мешачно – Шуренє журки у „Фабрики” у жимскей сезони, од октобра до марца, а у медзичаше ткв. Ошур збуваня у других местох у Войводини и Сербиї. Як ше им звекшує популарносц, так и обовязки и одвичательносц вше векши.

– Вообще нє лєгко, робота наисце озбильна. Закупиме „штири мури” и шицко сами обдумуєме и ришуєме. Од идеї, випатрунку, бини, шанку, обезпеченя, прейґ инструментох, озвученя, по маркетинґ, шицко то наша обовязка. Розуми ше, нє робиме тото особно, анґажуєме продукциї, а ми ше фокусуєме лєм на промоцию музики и правенє бренда пре хтори людзе купя уходнїцу и нащивя „евент” – гваря Боянович и Ройко.

Drum and bass музика настала початком 90-их рокох. Ище вше ше розвива, то найкомпликованша и найшвидша файта елекронскей музики, а же би ше ю вимиксовало, треба ю, як гваря, знац слухац.

– Поступок миксованя випатра так же ше пущи єдну писню, а на слухалки ше слуха иншаку писню зоз другого ЦД-а. Тоту другу писню публика нє чує, док ше ю на миксети монтира, односно миксує. Намиксовану писню ше доклада на першу писню, та вец иду два источашнє. Мож намиксовац и 4 писнї, лєм за тото треба наисце вельо схопносци. Нє чежко научиц, алє єден диджей муши мац слух, любиц тоту файту музики и препознавац ритем – толкую вони.

Promo Fotka1

ДЗЕЧНЄ ШЕ ВРАЦАЮ ДО КЕРЕСТУРА

Того лєта наступели и на „Пакт он” журки у Руским Керестуре, за хтору видвоєли 4 годзини, гоч їх звичайни наступ тирва годзину, або годзину и пол.

– Задовольни зме зоз терашнїм руководством орґанизациї „Пакт Рутенорум”. Нажаль, скорей зме мали и неґативни искуства кед зме участвовали на збуваньох у Керестуре. Намагали зме ше, аж зме пристали пущац и файту музики хтору   иншак на наших наступох нє пущаме, а нє вше нас випочитовали, та нам було криво. Медзитим, на тогорочней журки шицко було так як треба, випочитовали нас на шицких уровньох, од шветла, звуку, финансийох по любезносц и комуникативносц орґанизаторох. Маме наисце лєм позитивни упечатки. Без огляду на стари неґативни искуства, вше любиме видвоїц час и присц до валалу – припознава Бозне, а Рокстер додава:

– У Керестуре нови, млади ґенерациї хторих вше баржей интересує drum and bass, та нам окреме мило кед им можеме приблїжиц тоту музику.

Drop Sensei нєшка найпознатша музична орґанизация у Сербиї хтора промовує drum and bass музику. Велї ше чудую як ше им поспишело за три роки посцигнуц таки успих.

– Походзиме зоз менших местох, а удало ше нам зоз „underground” музики направиц „бум”, нє лєм у нас, алє на цалим Балкану. Напевно прето же ше добре складаме, алє найважнєйше же ше о шицким вєдно радзиме – закончую Бранимир Боянович и Борис Ройко.

Promo Fotka 10 Mefjus zoz Austriji

  СЕЗОНА 2015/16

У новей сезони на каждим Шуреню буду госцовац найменєй троме странски продуценти и диджейове.

Перши векши „евент” Mask & Bal у „Фабрики” будзе 31. октобра, а 14. новембра першираз отримаю Ошур у Лесковцу.

Буду орґанизовац дочек Нового року на Спенсу, под назву ŠureNYE 2016 у сотруднїцтве зоз познату музичну орґанизацию Respect DJ’s.

– Орґанизуєме и перши drum and bass фестивал у Сербиї, з назву „Shuriken”, хтори ше отрима у юнию 2016. року у Новим Садзе – премиєрно за „Руске слово” наявели з орґанизациї Drop Sensei. 

 МОЖ ИХ ПРОВАДЗИЦ НА ИНТЕРНЕТУ

Шмати зоз Drop Sensei лоґом мож наручиц на сайту www.dropsensei.com а щицки збуваня и роботу тей музичней орґанизациї мож провадзиц и на їх Фейсбук фан-пейджу Drop Sensei, як и на youtube каналу www.youtube.com/dropsensei дзе мож одпатриц професиойни знїмки найлєпших хвилькох зоз Шуренє журкох.

Drop Sensei

ПОВЯЗАНИ ТЕКСТИ