Дзвери отворени и за нових читачох и за креативни идеї

автор A. Медєши
206 Опатрене

У Народней библиотеки Кула, односно його оддзелєню у Руским Керестуре, нєдавно пришло до кадрових пременкох. Место потерашнєй, длугорочней библиотекарки Мариї Дорошки хтора здобула право за одход до пензиї, тераз занята Ґабриєла Саянкович. А як познате, нови людзе приноша и нови идеї и нову енерґию, та зме з тей нагоди зоз библиотекарку побешедовали о реорґанизациї и иншаким розпорядку у библиотеки, алє и о планох и амбицийох надалєй

После єдней кратшей прерви, библиотека у Руским Керестуре зоз порядну роботу почала у октобре. Од теди отримани уж даскельо активносци, но пред тим як ше читательом отворело дзвери за нови наслови и виданя, направена реорґанизация. Тераз, окрем прегляднєйшого розпорядку и з новима виданями „ошвижених” полїчкох, нови випатрунок достал и двор Замку, односно простор коло уходу до библиотеки.

– Кнїжки нам тераз кус иншак поскладани, по даяких правилох хтори вязани за библиотечни стандард, а хтори ше у медзичаше пременєл. У тим ми помогли и двойо колеґове зоз Кули, хтори єден мешац приходзели ту и прескладовали кнїжки зато же ше роби о фонду зоз 15.000 кнїжками, за цо наисце требало досц часу. У дворе було досц желєнїдла хторе ше през лєто розширело, та и тото требало розчисциц. З тей нагоди бим подзековала и роботнїком з „Рускому” и школским майстром хтори у тим вельо помогли. Наяр плануєме ище єдну акцию ушорйованя двора, понеже сцеме направиц дацо таке як лєтнїковец або читальню на отвореним, дзе би могло орґанизовац литературни вечари. У дворе маме барз красни, високи древа хтори правя фини хладок и през лєто би бул наисце приємни амбиєнт за читанє и друженє, була би права чкода таке дацо и нє вихасновац – приповеда нова библиотекарка Ґабриєла и наявює нови активносци.

Пририхтованя и за 150-рочнїцу од снованя першей Читальнї

Тото цо наисце интересантне, а велїм нє познате, то же керестурска библиотека єдна од найстарших културних установох хтори Руснаци маю, наглашує през бешеду Саянковичова. Керестурец Ферко Пап Радванї, зоз учительом Михайлом Джуньом основал першу читальню у валалє 1876. року, та ше уж од тераз помали почина роздумовац як би 2026. року требало означиц 150-рочнїцу од єй снованя.

– Тота перша читальня у Керестуре була у дакедишнєй приватней Ердельовей хижи, тераз на тим месце нови манастир. На тей хижи була дакеди и мемориялна табла, медзитим, вона знята кед направени манастир, та ше наздавам же з нагоди означованя тей рочнїци будзе нагода и врациц таблу на место дзе дакеди була. Важне спомнуц и мено Ферка Пап Радваня, бо бул наисце чловек хтори у свой час вельо робел на просвищованю Руснацох у Керестуре – здогадує нас Ґабриєла о тим значним Керестурцови чий животни мото бул „И слуга може постац ґазда кед вецей научи”.

Интересантне визначиц и податок же валалска библиотека у Керестуре єдна з ридких хтора ма два оддзелєня, од хторих єдно на руским язику, а кнїжки ше, у тим оддзелєню, евидентую окреме.

– У тим оддзелєню єст наисце стари виданя хтори уж нєт нїґдзе индзей анї купиц анї опатриц, окрем ту. Поведзме, народни календари єст надосц, алє бим любела кед би людзе хтори их чуваю дома, а нє треба им вецей, же би подаровали библиотеки. Ми би их дзечнє прияли и понукали на розполаганє людзом хтори любя виглєдовац историю Руснацох – толкує наша библиотекарка.

Цо вецей робиц з наймладшима

През нє полни мешац, у библиотеки уж отримани даскельо активносци. Єдна з нїх була манифестация „Ноц библиотекох”, 6. децембра, кед валалску библиотеку нащивели школяре Ґимназиї, а потим и члени библиотеки, та ше през черанку упечаткох дискутовало о пречитаних кнїжкох. Новинско-видавательна установа „Руске слово” подаровала нови шейсц сликовнїци зоз тогорочней продукцї Едициї за наймладших „Русалка”. О планох за наиходзаци рок ше интензивно роздумує, а дзвери библиотеки вше отврени и за нови предклади.

– Од Нового року, плануєме дочекац школярох и зоз других оддзелєньох Ґимназиї, а тиж и предшколски дзеци зоз Оводи и старшей ґрупи у оводи. Тото на чим би я особнє любела робиц, то на роботнї за дзеци. Плановали зме орґанизовац читанє схазкох дзецом. Поволала бим шицки мацери, та и млади мацери хтори маю беби, же би пришли. Маме наисце вельо дзецински кнїжки зоз краснима илустрациями. За наймладших маме обдумани єден куцик дзе тоти кнїжки и виложени. Же би тот куцик бул дзецом приємнєши помогли нам тапетария „Мая” и тапетария „Тина” хтори подаровали табурета и з тей нагоди им дзекуєм. Плановали зме и подаровац кнїжки Дому за старих и пензионерох, а можебуц и направиц даяку меншу библиотеку у нашим Доме кед буду розположени за сотруднїцство, з оглядом же старши людзе у питаню и їм нє лєгко приходзиц до библиотеки. Подаровало би ше им кнїжки за хтори єст два прикладнїки, так же и за то уж маме даяки видвоєни наслови. У плану нам зоз читателями отримовац и даяки стретнуца, друженя, чераня упечаткох, а можебуц и даяки промоциї кнїжкох кед же будзе нагоди. Поволала бим и шицких хтори маю даяки креативни идеї же би нам их предложели, а тиж и тих хторим можебуц потребни простор за отримованє чи вечарох, стретнуцох, даяких едукацийох, можебуц и за менши концерти… Дзвери библиотеки отворени шицким хтори маю даяки креативни идеї, а хтори би було прикладно реализовац у библиотеки – за конєц наглашує Ґабриєла, ище раз визначуюци же фонд кнїжкох обновени зоз новима виданями хтори сцигол на полїчки пред мешацом.

Календари мож подаровац до библиотеки

– Народни календари маме досц, алє бим любела кед би людзе хтори их чуваю дома, а нє треба им их вецей, же би их подаровали библиотеки. Ми би их дзечнє прияли и понукали на розполаганє людзом хтори любя виглєдовац историю Руснацох – гварела Ґабриєла.

Читателє нє вибераю

Валалска библиотека у тей хвильки ма коло 150 членох, а по словох библиотекарки, чита ше шицко. Од белетристики, популарней психолоґиї, по руски класики, романи рижних жанрох – трилери, драми, любовни… Медзи найглєданшима авторами находза ше углавним америцки авторе – Лусинда Райли, Нора Робертс, Николас Спаркс, Стивен Кинґ, Джон Ґришам, Роберт Ладлам, Перл Бак, Ю Несбе, алє и велї други…

ПОВЯЗАНИ ТЕКСТИ