Екуменска гуманитарна орґанизация означує 30 роки роботи

автор М. Горняк Кухар
363 Опатрене

НОВИ САД ‒ Зоз конференцию за медиї, 20. фебруара у Новим Садзе, Екуменска гуманитарна орґанизация (ЕГО) означела 30 роки своєй роботи и дружтвеного уплїву, з наяву подїйох хтори ушлїдза у наиходзацим периодзе.

Як гварене на конференциї, през 30 роки ЕГО прешла през велї спокуси и етапи розвою, та од орґанизациї, хтора од свойого першого дня и цеком 90-тих рокох дзелєла гуманитарну помоц загроженому жительству на териториї АП Войводини, прейґ орґанизациї хтора ослуховала потреби ранївих ґрупох и швидко реаґовала на нови кризи, пришла до орґанизациї хтора дала доприношенє вибудови гражданского дружтва.

За медиї бешедовали предсидатель Скупштини ЕГО Андрия Марчок и директорка ЕГО Ана Бртка Валент. Вони здогадли же терашнї состав Скупштини ЕГО творя представнїки Словацкей еванґелицкей А. В. Церкви у Сербиї, Реформатскей християнскей Церкви у Сербиї, Епархиї Святого Миколая ‒ Руски Керестур и Еванґелицкей християнскей А. В. Церкви у Сербиї ‒ Войводини. З тей нагоди здогадуєме ше и же вельке доприношенє у роботи ЕГО у Новим Садзе дал покойни, длугорочни парох новосадски о. др Роман Миз.

Централна преслава 30-рочнїци ЕГО будзе 10. мая, вєдно зоз цильнима ґрупами хторим ше помага, з тей нагоди и пригодна вистава и схадзки, же би ше формовало стратеґийни план за шлїдуюци период.

ПОВЯЗАНИ ТЕКСТИ