Екуменске стретнуце хорох церковного шпиваня

автор М. Горняк Кухар, фото Б. Сакач
396 Опатрене

ЗЕМУН – У римокатолїцкей Церкви Вознесеня Блаженей Дїви Мариї, 22. октобра, отримане 12. Екуменске стретнуце хорох церковного шпиваня, на хторим участвовал и Хор „Гармония” з Нового Саду.

Дириґовала Сузана Ґрос Маркович, солистки були Свитлана Декар и Бранка Оклєша, а шпивали „Тебе поєм” Стевана Мокраньца, „Святи Боже” o. Ивана Заяца, „Милосц мира” Александра Арханґелского и „Во царствиї Твоєм” Добри Христова.

Наступели и Мишани парохийни хор „Св. Цецилия” зоз Земуну, Шпивацки збор „Пойоча дружба” з Беоґраду, Мишани хор „Тилиа” зоз Старей Пазови, Хор „Арс Вокалис” з Беоґраду, „Св. Цецилия” зоз Сримскей Митровици и Вокални ансамбл „Полифоника”.

Як гварел директор Хора „Гармония” Борислав Сакач, на концу концерта, шицки хори вєдно у екуменским духу одшпивали два комозициї: „Тебе поем” од Мокраньца и „Милосц” („Amazing grace”), Джона Нютна (John Newton).

На концерту були и Ґаврило Ґрбан зоз Управи за сотруднїцтво зоз Церквами и вирскима заєднїцами у Министерстве правди (хторе було и єден з покровительох стретнуца), потим представителє зоз Амбасади Горватскей, владика сримски коадютор, монс. Фабиян Свалина, парох у Земуну монс. Йозо Дуспара и представнїк протестантскей Церкви з Новей Пазови.

ПОВЯЗАНИ ТЕКСТИ