КОЦУР – Искри внєдзелю побида и урядово обезпечела титулу єшеньского шамипона, а фодбалере на найлєпши можлїви способ розвешелєли коцурску публику, котра у вельким чишлє пришла потримац клуб.
Гваря же напредок достати стретнуца найчежше победзиц и того ше найвецей обавали у Искри. Потенциялна побида процив процивнїка котри у долнєй часци таблїчки Искри би обезпечела титулу шампиона. Тренер Веселин Вукадинович и бавяче Искри добре ше пририхтали за тото стретнуце и од початку указали госцом же нєт места за нєсподзиванє. Искра од старту нападала и публика наисце могла уживац у бависку. Госци знали загрожиц зоз процивнападох и зоз єдного такого мало хибело же би перши пришли до предносци. Центарфор ФК „Нєґош” зоз Ловченцу вибил сам опрез ґолмана Ступара, алє Ступар ище раз указал же є у тей сезони за тераз можебуц и найлєпши ґолман у лиґи, понеже одбранєл скоро сиґурни ґол. После тей гришки и одбрана Искри осторожнєйше почала бавиц и добре заверала приходи ґу ґолу.
На перши ґол ше чекало 15 минути. Малацко добре копнул зоз дистанци и потрафел ґол. Лєм цо госци рушели зоз центру, Искрово бавяче освоєли лабду, котра дошла до Секулича котри зоз 16 метерох знова добре копнул та у 17. минути уж було 2:0 за Искру. Домашнї фодбалере ришено рушели у першим полчаше ришиц питанє побиднїка, а то им ше и удало у 32. минути прейґ найлєпшого стрилца лиґи Данила Янковича. По одпочивок резултат ше вецей нє менял.
У другим полчаше тренер Вукадинович дал нагоду и бавячом котри були на лавки за резерви и мож повесц же и вони оправдали довириє понеже одбавели добре. Янкович у 70. минути дал свой други, а Искров штварти ґол на тим стретнуцу и праве кед шицки подумали же Искра и на пиятим стретнуцу за шором зачува свой ґол, госци после гришки резервного ґолмана Радоєвича зменшали на 4:1. Понеже по конєц стретнуца остало ище даскельо минути очековлао ше же то будзе и конєчни резултат, медзитим у остатнїм нападу точку на тото стретнуце положел капитен Искри Зоран Сердар и поставел конєчни резултат 5:1 за Искру.
Состав коцурскей Искри: Ступар (Радоєвич), Секулич (Неделькович), Роґанович, Човс, Сердар, Малацко, Комазец (Суботич), Мачиженски, Янкович (Зорич), Колошняи, Михняк (Бодонї)
По конєц полусезони остало одбавиц ище лєм єдно коло у котрим Искра будзе госцовац у Таванкуту, алє розлика медзи Искру и другопласованим Томиславцами 4 боди та и кед страци коцурски клуб будзе єшеньски шамипон. Медзитим, о пораженю нїхто анї нє роздумує и шицки у клубе жадаю же би Искра полусезону закончела без пораженя цо би бул позарядови успих.