РУСКИ КЕРЕСТУР/КАРАВУКОВО/КОЦУР – Младши катеґориї Фодбалского клуба „Русин” стреду 11, пияток 13. и всоботу 14. юния бавели пейц пририхтуюци стретнуца, и зазначели два побиди, єдно стретнуце одбавели нєришено, док два стретнуца страцели.
На пейц одбавених стретнуцох у штирох дньох, змагали ше дзеци предшколского возросту и дзеци хтори ходза до пешрей, другей, трецей и штвартей класи основней школи.
У Каравукове бавели ФК „Полет” Каравуково 2018/19/20 – ФК „Русин” 2018/19/20 – 2:3. Ґоли за екипу Русина дали: Иван Гарди (2) и Александар Пекич (1).
На коцурским стадиону бавели ФК „Искра” 2018/19/20 – ФК „Русин” 2018/19/20 – 1:0.
ФК „Искра” 2017 – ФК „Русин” 2017 – 5:3. Ґоли за екипу Русина дали: Матей Югик (2) и Лука Кренїцки (1).
У Руским Керестуре бавели ФК „Русин” 2016 – ФК Червинка 2016 – 3:3. Ґоли за екипу Русина дали: Лени Грнчяр (1), Стефан Зорич (1) и Милан Цвєтичанин (1).
Дзеци хтори ходза до трецей и штвартей класи основней школи бавели єдно стретнуце, бавели помишано три полчаси по 15 минути. Єден полчас бавела окреме треца класа, други полчас бавела окреме штварта класа, док треци полчас бавели помишано и треца и штварта класа. Од трох полчасох цо одбавели, екипа Червинки була лєпша у двох полчасох, док екипа Русина победзела у єдним полчасу.