КУЛА – Того викнду, всоботу 24. януара отримани ювилейни 20. Паприґарски бал. Бал по першираз нє отримани у Руским Керестуре, алє у Кули у Ресторану „Код Чира”, а главна награда, реґал за дньову хижу, пошла до Коцура.
Баловали ше 185 особи, векшина з Керестура, алє и зоз других местох, Кули, Лалитю, Коцура, Вербасу и Червинки.
Перша награда була реґал за дньову хижу, потим вельки орман, телевизор, бициґла, баранче, прашата, палета древох, и ище вельо того, а вкупна вредносц томболох була коло 700.000 динари. Перша, главна награда пошла до Коцура, док други два однєшени до Керестура. Розкошну томболу, попри домашнїх тапетарох, спонзоровали и други подприємства з валалу, а єдну часц дал и орґанизацийни одбор балу.
Бал орґанизовали фамелиї – Надьова, Планчакова, Колошняйова и Фаршанґова, а за музику и веселу атмосферу хтора потирвала аж до позних годзин, задлужени бул бенд „Коцурски бетяреˮ.
