ВЕРБАС – ЯКП „Комуналєц” розписало подобови конкурс за предшколцох, и подобови, литературни и фото конкурс за школярох основних школох зоз териториї општини Вербас на тему „Од кеди ме принєсла ґовля на першим месту ми вода” (Од када ме је донела рода на првом месту ми је вода).
Конкурс отворени од 20. априла по 15. май, а роботи ше посила або придава на писарнїцу ЯКП „Комуналєц”, Саву Ковачевича 87, 21460 Вербас. Роботи мож придац особнє, а може и по воспитачох, учительох и наставнїкох зоз дзецинских заградкох, односно школох. На роботи треба же би було написане мено и презвиско автора, назва установи, мено и презвиско ментора. Єден автор може участвовац найвецей зоз єдну роботу, а предшколци можу мац и ґрупну роботу.
Слово о традицийним конкурсу Комуналца, зоз цильим же би ше порушало наймладших на роздумованє о значносци води за цали живи швет на планети Жеми, понеже фаховци уж роками спозорюю же у будучносци будзе проблем обезпечиц воду за пице.
Подобово роботи можу буц виробени зоз шицкима подобовима технїками, а фотоґрафиї муша буц направени у периодзе тирваня конкурсу, нє шму буц обрабяни, а можу буц висликовани и зоз сликерню и зоз телефоном, можу буц доставени у паперовей або диґиталней форми. Литературни роботи, писнї або кратки приповедки мож пронєсц на писарнїцу на А4 формату, можу буц написани и на язику националних меншинох, алє треба же би мали и преклад.
Фахови жири одредзи побиднїкох у каждей катеґориї, Комуналєц обезпечи награди и припознаня, и виставу шицких роботох. Подробнєйши информациї мож достац на телефонски числа 021/706-575, 064/805-7434 и 064/6432-497, або на имейл адресу marketing@komunalacvrbas.rs.