КУЛА – Спортски бависка младих у Кули почали штварток, 1. юния зоз палєньом огня приятельства.
За розлику од прешлого року, кед цала манифестация була у дворе Основней школи „Иса Баїч”, того року програма, зоз винїмком кошарки 3 на 3, отримана на фодбалским стадиону „Милан Среданович” у Кули.
Учашнїки ше змагали у шлїдуюцих дисциплинох: Кока кола куп, турнир у малим фодбалу, кошарка 3 на 3, медзи два огнї и обегованє на 60 метери.
На тим змаганю участвовали и млади атлетичаре зоз Руского Керестура, возросту од першей по штварту класу котри ше змагали у обегованю на 60 метери. Участвовали 8 атлетичаре: Лука Тасич, Анастасия Пекич, Николая Медєши, Кира Пап, Лена Ґолубович, Адриана Штранґар, Каратина Дудаш и Валентина Надь. Дзеци були подзелєни до двох ґрупох, обеговали ше вєдно перша и друга класа, 2014. и 2015. рок, а потим вєдно треца и штварта класа, 2012. и 2013. рок. Було осем ґрупи и вельо змагательох, а обеговало ше на час. Гоч нашо дзепоєдни атлетичаре и закончели обегованє на першим або на другим месце, нє удало ше им пласовац ше до полуфинала.
Кула други раз домашнї тих бавискох, а того року отримани ювилейни, дзешати турнир Спортских бавискох младих у Сербиї.
На поволанку орґанизатора одволали ше спортски колективи зоз кулскей општини, а даєдни з нїх то: Фодбалски клуб „Гайдук 1912”, Школа фодбалу „Кула С”, Атлетски клуб „Гайдук Маратон тим”, Одбойкашски клуб „Гайдук” Кула и велї други.
После того змаганя на општинским уровню, побиднїки иду на реґионалне змаганє котре будзе 12. юния у Жаблю.
Орґанизатор и ґенерални спонзор Спортских бавискох младих: „Дунав осиґуранє” и „Кока кола”.
