ФРОЗЕНОНЕ (ИТАЛИЯ) – Ґимназиялци першей и другей класи Штреднєй школи „Петро Кузмяк” котри од 12. фебуара пребували у месце Фрозеноне у Италиї врацeли ше вноци.
У Италиї були на фаховей пракси у Технїчней школи „Алесандро Волта”, а у рамикох програми мобилносци Еразмус плус. Зоз школярами одпутовали професорка Лїля Рудакиєвич координатор проєкту, и професорка Соня Чапко. Родичи школярох кажди вечар доставали, наисце вичерпни звити о тим цо школяре робели и як ше чувствую, подкрипени зоз фотоґрафиями обидвох професоркох.
Домашнї школи „Алесандро Волта“ наших школярох крашнє прияли. Кажди школяр мал свойого домашнього школяра, котри му помагал прилагодзиц ше новим условийом. Школяре пребували у готелу месце Фрозеноне, котре мирне и у котрим ше нашо школяре лєгко знашли. Керестурсци мали нагоду присуствовац и на карневалу плодносци и просперитету, котри бул орґанизовани на главней площи, дзе за нїх була орґанизована журка. Делеґация нашей школи нащивели городску хижу дзе их привитал и поздравел городски секретар за спорт.
У домашнєй школи школяре ше стретли зоз шветом науки, технолоґиї и програмираня, на годзинох физичного танцовали, на годзинох физики их окреме похвалєл домашнї професор, учели италиянски язик, а на звонка наставних годзинох упознали ше зоз проєктами роботики. Єден дзень бул шлєбодни и того дня домашнї зоз Италия и нашо школяре вєдно нащивели Рим, главни город Италиї и упознали його красу.
