ИНДЇЯ – У грекокатолїцкей парохиї у Индїї, внєдзелю 31. авґуста першу найблїзшу нєдзелю коло швета 28. авґуста кед Успениє Пресвятей Богородици, того року пренєшене означованє того швета и преслава Кирбая. Источашнє означена и 60-рочнїца як основана парохия, у котрей тераз длужносц пароха окончує о. Михайло Шанта.
Кирбайску архиєрейску Литурґию предводзел наш епарх преосвящени кир Георгий Джуджар, а сослужели священїки з наших парохийох, керестурски катедрални парох о. Владислав Варґа, сримски декан о. Михайло Режак, сримскомитровацки и беоґрадски парох о. Иґор Вовк, капелан керестурски о. Ярослав Вовк, як и домашнї парох о. Шанта.
Владика наказовал цо значи швето Успениє Богородици, а огляднул ше и на историю индїйскей парохиї котру 1965. року основал тедишнї владика крижевски, а потим и надвладика беоґрадски Гавриїл Букатко
Було и вельо парохиянох, и госцох зоз Сримскей Митровици, тиж и шестри Служебнїци, а дзияковала и апостол читала Зоя Шанта.
По Служби вирни през здогадованя найстарших зложели пригодну бешеду о прешлосци тей наймладшей парохиї у тедишнїм крижевским владичестве, о чежкосцох з якима ше стретал перши парох о. Стефан Питка и його вельку усиловносцу и упартосц кед почал будовац терашню церкву и парохийни дом.
На концу парохиянє за шицких присутних пририхтали почасценє и друженє.
