БЕОҐРАД – На 52. Сайму образованя и наставних средствох, стреду 25. октобра представени школи у хторих ше образую припаднїки националних меншинох и инклузиї.
Образованє у Сербиї ше у порядней настави одбува на 8 язикох националних меншинох, а пияти дзень на Сайму на штанду Министерства просвити, зоз назву „Поробне най швет будзе лєпши”, ше представели школяре основних школох у хторих ше настава на меншинских язикох одбува у порядней настави, або дзе меншини маю виборну наставу мацеринского язика зоз елементами националней култури.
На штанду Минстерства просвити представели ше школяре ОШ „Братство єдинство” зоз Коцура, ОШ „Матко Вукович” и ОШ „Сеченї Иштван” зоз Суботици, ОШ „Филип Кляїч Фича” з Беоґраду, ОШ „Янко Чмелик” зоз Старей Пазови и ОШ „Йован Цвиїч” зоз Костолцу.
Руске оддзелєне зоз ОШ „Братство єдинство” зоз Коцура представели школяре Мария Сакач, Филип Бесерминї, Надя и Даниєла Ґайдош и Рамона Будински през рецитациї, драмску сличку, руски танєц представели свою школу, годзини руского язика на хторим ше школую и учебнїки зоз хторих ше уча.
Зоз школярами на Сайму була директорка школи Сенка Мученски, наставнїца Мелания Мали и предсидателька Одбору за образованє Националного совиту Руснацох Олена Папуґа. Була им то нагода же би побешедовали зоз другима директорами двоязичних школох, як и зоз державну секретарку за образованє националних меншинох Анамарию Вичек.
