Цали швет жиє у чежких часох фалшивих информацийох, войнох, гладу, природних катастрофох, и очиглядне же иснує огромна збунєтосц у шицких аспектох живота. Нє лєгко пренайсц сиґурни напрям, а ми найчастейше звикли лєм критиковац, а нє и будовац. За будованє потребни розвой знука чловека, а то нє мож без фундаментох. Можебуц нас найвецей потрафя нєдостаток моралних фундаментох.
Под мотом шлєбоди, хтору нє вше знаме хасновац, жиєме у зависносци од дружтвених мрежох и медийох, хтори маю числени предносци, алє нас тиж так и оддалюю од нас самих и од других людзох. Комуникуєме, алє индивидуалносц велька, и нє способни зме за соживот. Бешедуєме лєм о насилстве, хторе евидентно присутне коло нас, алє нє и о бенефитох соживота за шицких нас.
Вредносци исную же бизме розликовали добре од нєдоброго, праведне од гевтого цо прави чкоду другому. Правда и справедлївосц то мера и способ приступу ґу моралним нормом. И, гоч нєшка иснує криза моралу у модерним дружтве, то нє продукт лєм єдней ґенерациї. Гоч старша популация розчарована до младих, и млади ше чувствую знєверени пре поступки за котри одвичательни старши ґенерациї.
Найважнєйше младши ґенерациї научиц же ше угляд и добри глас, або гоч хтору позитивну прикмету, нє здобува з нєодвичательним справованьом хторе настава зоз власних, себичних импулсох, алє лєм з одвичательним заступаньом общих, заєднїцких интересох, на хасен шицким у заєднїци, а за хторе ше нє обчекує награду.
Буц чловек то морални задаток, а нє факт, бо чловек по дефинициї морална особа, алє то значи же чловек ше нє народзи, алє будує през воспитанє и едукацию. Морал би требало нєпреривно обновйовац, а, вшелїяк, би требал буц у образованю ґенерацийох хтори приходза. Нєшка чловек може страциц роботу пре одбрану свойого достоїнства. Кед нє можеш буц чловек кед робиш з даякима людзми, хтори це дриляю до нєморалних роботох, нє мушиш буц з нїма. То вибор, а робиц мож и другу роботу, алє чесно.
Морал найвекши испит чловечносци, и на тим испиту кажде з нас зочени зоз собу, чловечносцу и вичносцу. У моралу нє исную права, алє лєм длужносци. Маме длужносц бешедовац лєм правду, алє и право бешедовац нєправду. И за єдно и за друге зношиме одвичательносц. Нєт оправданя за потупйованє моралних нормох, або ши морални або нє.
Чловечество може прежиц лєм кед ґлобално прилапи етику справованя и морални правила хтори би важели за шицких, а єдно зоз златних правилох и тото цо давно записане у Евангелиї, як слова Исуса Христа : „Цо жадаце же би людзе робели вам, робце и ви им”. (Матей 7:12)
ruske.redaktorka@gmail.com