У системи вредносци младежи, култура забера релативно високе место. Гоч система у дружтве часто нєвигодна, вплїв култури на каждодньови живот и роботу младих зведзени на минимум лєбо ше траци, и мож повесц же ситуация чежка. Заш лєм, велї млади з нашей заєднїци нє дзвигаю руки од участвованя, та и самого твореня рижних културних подїйох, змистох, дїлох и подобне, а зоз тим ше наисце можеме цешиц. Єдна з тих котра шмело крача по дражкох култури и наш будуци културолоґ, студентка Марина Тодич зоз Коцура.
Марина народзена у Коцуре, дзе закончела и основну школу. Стреднє образованє здобула у Карловацкей ґимназиї, на напряме за французки язик, а потим ше уписала на студиї Културолоґиї на Филозофским факултету у Новим Садзе. Уживала у каждей етапи образованя, з каждей ноши гевто найкрасше, алє ґимназия забера окремне место у єй шерцу.
Карловацка ґимназия – найлєпша школа
– Наисце думам же Карловацка ґимназия найлєпша школа на швеце. Кед бим ше ознова уписовала, вше бим вибрала праве ю – з ошмихом почина приповедку наша студентка – то ми бул найлєпши период у живоце. Жила сом у стредньошколским доме, мала сом одлични цимерки, и з того периоду живота мам барз красни памятки.
Як гвари Марина, гоч на початку було кус чежко звикнуц ше на живот у Новим Садзе, нє було лєгко пойсц з обисца на 14 роки, кельо мала кед ше уписала до стреднєй школи, понеже почала кус скорей ходзиц до основней, дума же є тераз така особа и же ма таки интересованя праве прето же ходзела до тей школи.
– Думам же бим нє була тото цо сом тераз кед бим нє ходзела до Карловацкей ґимназиї. Одношенє медзи професорами и школярами було барз красне, як пайташе зме були, алє у найлєпшим можлївим смислу того слова. То нам барз значело и формовало нас до вредних и добрих особох, жадних нових знаньох и интересованьох.
Кед пришол час уписац ше на факултет, двоєла ше чи то буду студиї продукциї на Академиї уметносцох у Новим Садзе чи Културолоґия, алє любов ґу култури превагла.
– Гоч нє було лєгко одлучиц, нє побановала сом анї у єдней хвильки. Похопела сом же ме баржей интересує сама теория и култура у ґлобалу, як филмска продукция, и же ме интересує у ствари робота у култури. Я друга ґенерация студентох на тим напряме и наисце є як направени за мнє – щиро з ошмихом толкує – шицко ми ше пачи. Апеловала бим з тей нагоди на шицких младих же би голєм вжали до огляду уписованє на Културолоґию, бо думам же нам хиби фахових културолоґох. Ми у нашей заєднїци маме вельо людзох котри робя у култури, алє поправдзе, крашнє учиц о тих стварох котри ми видзиме по наших Домох култури, културно-уметнїцких дружтвох, видзиц их у теориї, їх историят, филозофию, наисце барз интересантне и шицко мож применїц.



Одмалючка є активна у КУД „Жатва”
Окрем стреднєй школи, як далєй приповеда Марина, на саме формованє єй як особи вельки уплїв мал и сам живот у Коцуре. До Дому култури вошла першираз кед мала два, три роки, и од теди, як гвари, нїґда нє вишла. Роками є активни член у КУД „Жатва” и зна же на обидвох бокох людзе на котрих ше може опрец и котри єй вше помогню.
– Думам же тото цо ше нам понука у нашей заєднїци и у валалох треба вихасновац. Гоч яку сом идею мала у стреднєй школи и на факултету, та аж и у основней, вше сом мала потримовку людзох з Коцура кед сом сцела дацо зробиц. Перши проєкти сом написала у рамикох КУД „Жатва”, а тераз на факултету мам предмети у вязи зоз писаньом проєктох и мойо колеґове ше першираз стретаю зоз тим, барз им абстрактне, нє знаю цо то. А я, праве прето же сом одросла у такей заєднїци дзе сом кажду свою идею могла витвориц и мала потримовку, тераз ми на факултету вельо лєгчейше и знам о чим ше роби. Тиж, барз ми мило же сом одросла у такей заєднїци и прето же тераз можем баржей розумиц проблеми других заєднїцох, чи то даяки национални меншини, чи даяки марґинализовани ґрупи, алє думам же ми и лєгчейше похопиц шицко тото цо робиме на факултету, и теориї култури и филозофию култури, историю уметносци и подобне. Барз крашнє кед дацо цо видзиш и научиш у теориї можеш видзиц у пракси, а ище лєпше кед ти витвориш тоту праксу – щира Марина.

Важне вихасновац кажду нагоду, пробовац и потрудзиц ше
Студентом и шицким младим совитує же би кажду нагоду вихасновали найлєпше як можу, окреме кед жию у варошу. Як гвари Марина, Нови Сад понука вельо можлївосци, рижнородни волонтираня, безплатни путованя нєвладових орґанизацийох, а у велїх з того и вона сама участвовала, пробовала и потрудзела ше, дала себе. Як гвари, то кажде треба же би зробел.
– Шицки знаня котри мам тераз, мам праве прето же сом ше у рижних активносцох и проєктох опробовала. Наприклад, у стреднєй школи сом пробовала знїмац филми, и тераз видзим же то було єдно искуство дзе сом здобула даяки иншаки знаня и постала сом свидома того цо я ище можем робиц. Похопела сом же сом, можебуц, нє за режисерку, алє за продуцента, понеже мам орґанизацийни схопносци, мам таки прихильносци, и прето и студирам Културолоґию. Нє лєм же бим була теоретичар, алє же бим наисце орґанизовала културни змисти, робела у даякей културней институциї и подобне тому.
У Жатви є одмалючка, на фолклор ше уписала кед єй було пейц роки прето же, як приповеда, вона так сцела, вона инсистовала.
– Ходзела сом на фолклор, була сом у шпивацкей ґрупи, тераз робим зоз другима младима зоз КУД ,,Жатва, пишеме проєкти, орґанизуєме програми, орґанизуєме „Коцурску жатву”, нашу найважнєйшу манифестацию котра ма традицию длугу скоро 50 роки. Уж даскельо роки обдумуєм и орґанизуєм змисти за перши дзень манифестациї, и наисце у тим уживам. Ту екипа котра ми помогнє кед треба и пача ми ше одношеня и становиско яке маме – кед дахто ма даяку идею, треба же би ю витворел, та увидзиме цо будземе з тим – нашмеяно нам приповеда тота млада, талантована дзивка и предлужує:
– Мам тоту шлєбоду обдумац и порихтац дацо нове, лєбо дацо цо уж исновало, зробиц на свой способ. Шицки маме довирия єдни до других, и кед случайно дацо нє пойдзе як треба, знаме же ше маме на кого опрец и помогнєме єдни другим. Шицки тоти активносци попреплєтани зоз моїм будуцим фахом, котри ми уж тераз глїбоко у шерцу – припознава Марина.
Шлєбодни час люби виполнїц зоз рижнима интересованями, чита кнїжки, патри филми, а вше ту и друженя и шицко цо ноши живот єдней всестраней младей особи.
– Любим путовац и барз бим любела нащивиц Южну Америку. Тиж, наздавам ше же будзем мац нагоду пойсц и до Праги, бо ше ми уж видзи же шицки були, лєм я нє – приповеда през шмих – а любела бим упознац даєдну зоз скандинавских жемох. Цикави ме култура тих подручох, обичаї, и сиґурна сом же би тоти путованя були дацо цо будзем вше паметац – заключела Марина.
Як гвари на концу, подзековна є на шицких потерашнїх искуствох, на потримовки котру достава од шицких з котрима сотрудзує у обдумованю културних змистох у своїм валалє и индзей, а насампредз, на нєсебичней потримовки котру ма од своєй мами. Вона ю потримує на каждим крочаю, у каждей идеї, и то єдна з причинох, як гвари наша млада собешеднїца, котри ю формовали до особи яка є тераз. И пред котру, сиґурни зме, лєм блїщаца драга, виполнєта з културу, котру наша Коцурица ноши у шерцу и души.
