ШИД – У Словацким парку всоботу, 26. октобра отримана традицийна привредно-туристична манифестация „Срим клоб коб фест“ у орґанизациї Здруженя „Сримска забивачак и колбасияда“ и з помоцу локалней самоуправи.
Манифестацию отворел покраїнски секретар за привреду и туризем др Ненад Иванишевич хтори потим вєдно зоз предсидательом општини Шид Зораном Семеновичом и нащивел числени штанди.
Медзи штанадами ше представели здруженє жєнох „Маря“ зоз Шиду и „Бикичанки“ з Бикичу, як и поднїмателє Гнатково и Соколово з Бикичу и кушнїр Мирослав Сокол з Беркасова.
Отримане и змаганє у швидким фаластованю швинї, були два екипи, домашнї хтори и победзели з резултатом 6:46 минути, а госци зоз Босни и Герцеґовини зоз места Бравско мали резултат 7:03 минути.
Тиж числени екипи здзивали швижи колбаси, а отримане и змаганє хто швидше поє пражену колбасу.
Госцох було з рижних крайох Сербиї и зоз иножемства, а вечарши концерт отримал бенд „Ла банда“ з Нового Саду.
