СЕРБИЯ – Єден з найлєпших атлетичарох Сербиї, дзешецбоєц Михаил Дудаш меновани за спортского директора Сербского атлетского союзу.
Наш Михаил державни рекордер у дзешецбою, освоєл пєйц медалї на европских и шветових першенствох, од юниорскей по сениорску конкуренцию. Кед освоєл бронзову медалю на Европским першенстве у Амстердаму 2016. року, освоєл и националне припознанє. По своїм одношеню ґу обовязком и справованю ґу супарнїком на змаганьох постал приклад младшим ґенерацийом.
З посцигнутима резултатами на атлетских дражкох ширцом планети направел кариєру хтора шведок же Сербия ма спортского героя зоз хторим ше цеши. На числених змаганьох здобул искуство и познанства, а тиж так и почитованє своїх процивнїкох. З другого боку, спорту подаровал найлєпшу часц живота.
Довириє Михаилови Дудашови указали шицки у Сербским атлетским союзу. Єдногласно є вибрани на одвичательну функцию директора Сербского атлетского союзу.