РУСКИ КЕРЕСТУР – На отриманей 18. схадзки Совиту Месней заєднїци Руски Керестур, дзешецеро присутни члени, од вкупно єденацецерих, вигласали други штирирочни мандат потерашньому секретарови Михайлови Пашови.
При виборе секретара, на схадзки розпатрени два прияви, кельо вкупно сцигли на конкурс дати прейґ Явней оглашки. Обидвоме кандидати сполньовали условия за конкурс, та зоз тайним гласаньом, присутни члени Совиту, зверели ище єден мандат потерашньому секретарови Михайлови Пашови. Попри вибраного Пашу, на Оглашку за секретара МЗ конкуровал и Деян Русковски.

По дньовим шоре Совит, хторому предшедавала нєдавно вибрана предсидателька Илона Зарубица, прилапел Финансийни план и План явних набавкох за шлїдуюци рок. Буджет з хторим Месна заєднїца од шлїдуюцого року будзе розполагац виноши 5.465.000 динари. Попри стандардних трошкох, новина же од шлїдуюцого року до буджету ураховани и 300.000 динари хтори наменєни за ровнанє дильовох.
Под точку рижне, бешедовало ше о успишно реализованих активносцох у цеку рока, алє и о актуалних проблемох у валалє хтори у приоритету ришованя у наиходзацим периодзе.
