МОЙ ЛЮБИМЕЦ: Вивирки Сенди и Клои

автор Олеґ Катона
197 Опатрене

Мойо мено Олеґ Катона.

Файта животинї:

Чилеански вивирки-Деґу

Кельо маю роки:

Єдна ма три и пол, а друга осем мешаци.

Як мено твойому любимцови? Хто му дал мено ?      

Старшей мено Сенди, а младшей Клои. Сенди нє знаме хто дал мено, понеже зме ю достали, а Клои достала мено одо мнє, понеже сом ю купел на Кирбаю як дарунок за братов тринасти родзени дзень.

Як вон випатра? Можеш го описац?

Вивирки маю цму кафову шерсц и барз красни чарни очи и мали ушка. Брущок им билей фарби, а зуби месково. Хвост им як при патканьови, алє на концу маю дакус шерсци. Барз су шумни.

Цо твой любимец найволї робиц?

Вони найволя оштриц зуби на даяким древу, оганяц ше, любя ше вєдно грац и колїсац у колїмбачки. И любя бегац по хижи.

Як ше ти зоз нїм бавиш?

Я ше найволїм бавиц з нїма кед их винєм зоз клїтки, гласкам их, найволя ше гласкац по брущку и понад ушка. Любим их пущиц и да ми бегаю по хижи.

Можеш нам виприповедац даяку шмишну ситуацию зоз нїма?

Вони углавном у клїтки. Алє раз ме мой брат зобудзел на полноци и гварел же вивирки сцекли зоз клїтки. Я ше барз збунєл, та му я гварел най ше нє шалї зо мну. Вец зме их поцихи глєдали, да нє зобудзиме родичох. Сенди зме нашли у дньовей хижи под кавчом, а Клои була заварта у моєй хижи. Кед зме то похопели було нам барз шмишне же вона могла буц цалу ноц у моєй хижи, а да я нє знам. Хто зна як би то випатрало.

Чи биш препоручел и другим дзецом же би себе набавели такого любимца? И прецо?

Я би барз препоручел чилеански вивирки за розлику од других глодарох, понеже вони активни през дзень, а шпя вноци и вец мам вецей часу ше бавиц з нїма. Барз их любим, понеже ше любя бавиц, вжац до рукох, комуникую кед би ше бавели. Барз су ми интересантни прето же ше любя колїмбац на колїмбачки и то найчастейше вєдно. Тиж так су лєгки за отирмованє, нєт вельо обовязки коло нїх.

Кармиме их зоз єдзеньом за глодарох лєбо баш єдзенє за тоту файту, купуєме им и специялни лакотки и шено. Тото цо интересантне же ше купаю у писку, а нє у води.

Маш дома ище даяки животинї?

Мал сом до нєдавна два пшички хтори нєстали, алє ше ище вше наздавам же ше враца, бо их барз шицки любиме.

ПОВЯЗАНИ ТЕКСТИ