2. ОКТОБЕР – На нєшкайши дзень народзел ше Махатма Ґанди.
1836 – Природняк Чарлс Дарвин на ладї Биґл сцигол до анґлийского пристанїща Фалмут после пейцрочних виглєдованьох живого швета у Южней Америки и на островох у южним Пацифику, хтори одлучуюцо допринєсли розвою його теориї о еволуциї, односно о пременлївосци файтох.
1852 – Народзел ше хемичар Вилиям Ремзи (Ґлазґов, 2. октобер 1852 – Гай Виком, 23. юлий 1916), добитнїк Нобеловей награди за хемию 1904. року, хтори одкрил племенїти ґази гелиюм, арґон, криптон, радон, неон и ксенон.
1869 – Народзел ше Мохандас Карамчад Ґанди, лєбо Махатма Ґанди (Порбандар, Британска Индия, 2. октобер 1869 – Ню Делхи, 30. януар 1948), єден з сновательох сучасней индийскей держави, хтора нєзависносц виборела з нєнасилну револуцию, политичар, державнїк и борец за людски права.
1924 – Дружтво народох прилапело Женевски протокол за мирне ришованє медзинародних спорох.
1946 – На шветочней схадзки Городского одбору одлучене же з нагоди ошлєбодзеня од нємецкей окупациї, тедишнї Петровґрад пременї мено на нєшкайше Зренянин по народному геройови Жаркови Зренянинови.
Шветови дзень домашнїх животиньох (World Day for Farmed Animals). Дзень пошвецени животиньским файтом хтори ше хова на фармох. Основани є на дзень кед ше народзел Махатма Ґанди, хтори ше закладал за почитованє шицких живих єствох. Перши раз є означени 1983. року як часц медзинародного руху за права животиньох хтори ше хова на фармох.