23. МАЙ – На нєшкайши дзень школяром представена кнїжка за дзеци Воденїчка на стриберним потоку Мирона Будинския.
1707 – Народзени шведски природняк Карл фон Лине (Росхулт, Шведска, 23. май 1707 – Хамарби, 10. януар 1778), хтори запровадзел бинарну номенклатуру рошлїнох.
1814 – Премиєрно виведзена треца, конєчна, верзия опери Фиделио (Leonore, oder Der Triumph der ehelichen Liebe (Леонора, лєбо Триюмф малженскей любови)) Лудвиґа ван Бетовена у Кернтнертор театру (нєм. Kärntnertortheater).
1848 – Народзени инжинєр и пренаходзач Ото Лилиєнтал (Анклам, Нємецка, 23. май 1848 – Берлин, 10. авґуст 1896), чийо модели лєтадлох познєйше хасновани у конструкциї авионох.
1908 – Народзени америцки физичар Джон Бардин (Висконсин, ЗАД, 23. май 1908 – Бостон, 31. януар 1991), двойнїсти добитнїк Нобеловей награди за физику 1956. и 1972. року. Зоз Вилиямом Шоклийом видумал транзистор.
1977 – У Беоґрадзе отворени Музей африцкей уметносци. Музей отворени на беоґрадским населєню Сеняк, на Топчидерским брегу у Улици Андре Николича 14.
1999 – Авиони НАТО з ґрафитнима бомбами виволали нєставанє струї у скоро цалей Сербиї.
2025 – У Основней школи Братство єдинство у Коцуре представена кнїжка за дзеци Воденїчка на стриберним потоку Мирона Будинския. Кнїжка репринт виданя зоз 1970. року, алє є збогацена з новима илустрациями котри нарисовала авторова унука Лара Петкович. Попри тим, обявена и роботна тека у котрей преложени три приповедки на сербски язик, а илустрациї прилагодзени за вифарбйованє. НВУ „Руске слово” обявело тоту кнїжку у рамикох проєкту „Култура=кнїжка=природа – интеркултурални роботнї за дзеци” при Буджетским фонду за национални меншини Министерства за людски и меншински права и дружтвени диялоґ Републики Сербиї.
