28. МАЙ – На нєшкайши дзень народзени Ярослав Сисак.
1879 – Народзел ше математичар, астроном, климатолоґ, ґеофизичар и будовательни инжинєр Милутин Миланкович (Даль, 28. май 1879 – Беоґрад, 12. децембер 1958), бул популаризатор науки, универзитетски професор и академик.
1939 – Народзел ше ґлумец, режисер Ярослав Сисак (Пихнє, округ Снїна, Словацка, 28. май 1939 – Прешов, Словацка, 27. юний 2025). Стредню школу закончел у Педаґоґийней школи у Прешове, а вец ше придружел ґу драмскей екипи тедишнього Українского народного театра (УНТ) у Прешове. Ярослав Сисак бул єден з перших хтори студирал на Театралним институту Карпенко-Кари у Києве. Потим зоз студийох ґлуми прешол на режию. Бул уметнїцки руководитель драмского колектива УНТ, а вец бул и театрални режисер. У своєй ґлумецкей и режисерскей кариєри витворел вецей значни продукциї, а медзи иншим бул и коавтор премиєри Краля Лира на УНТ, цо було перше виводзенє Шекспирового дїла у театре у Словацкей. Под Сисковим водством дотедишнї театер, у октобре 1990. року постал Русински театер Александра Духновича, у хторим виводзени представи на українским и русинским язику. Зоз функциї директора Театра Александра Духновича пошол 1998. року, окрем того вон бул и автор прекладох драмох на русински язик хтори обявени у кнїжки: Театер Александра Духновича у прекладох Ярослава Сисака, хтору пририхтали Валерий Падяк и Михал Павлич у хторей обявени и драми Дюри Папгаргая. Ярослав Сисак за Руски народни театер Петро Ризнич Дядя на сцену поставел два представи: Агафия, старого попа дзивка Дюри Папгаргая, 1992. року и На дну Максима Горкого, 2002. року. Ярослав Сисак ше упокоєл у Прешове, 27. юний 2025, року дзе є и поховани 2. юлия.
1961 – Утаргнути Ориєнт-експрес, гайзибан хтори 78 роки ишол на линиї Париз–Истанбул.
1976 – До транспорту пущена гайзибанска драга Беоґрад–Бар, хтора з претаргнуцами будована 24 роки.
1999 – Потим як авияция НАТО змоцнєла напади на Союзну Републику Югославию (на 740 полєцованя авионох у 24 годзинох) югославянски предсидатель Слободан Милошевич прилапел шицки условия заходних жемох за претаргованє бомбардованя.
2001 – У Каиру отримана перша Дзецинска конференция африцких нацийох.