29. СЕПТЕМБЕР – Нешка ше означує Шветови дзень шерца.
1920 – Народзел ше фолклориста и етноґраф Ян Лазорик (Криванї, Словацка, 29. септембер 1920 – Прешов, 30. авґуст 2015). Зазберовал и записовал народни традициї, обичаї, фотоґрафиї, рижни предмети, народни присловким мудросци и приповедки, шицко цо вязане за дакедишнї живот предкох у реґионє Горнєй Тиси, так же дзекуюци и йому, шаришски край постал познати як шедзиско народней традициї и култури. Лазорик познати и Руснацом у Сербиї, насампредз фолклористом, алє и ширшей публики, понеже од 2014. року на репертоаре Руского народного театеру Петро Ризнич Дядя у копродукциї з коцурску КУД Жатва витворена представа Береме ше – так нам и треба, по мотивох з Лазорикового сериялу Опатьце. Фолклориста и културни роботнїк Ян Лазорик поховани у Криваньох 2. септембра, а комеморация отримана у месним амфитеатре.
1958 – Емитована перша заєднїцка програма Телевизийних давачох у Беоґрадзе, Заґребе и Любляни.
1988 – Медзинародни моци Зєдинєних нацийох за свою 40-рочну роботу достали Нобелову награду за мир.
2012 – Увиданю НВУ Руске слово и новосадскей Грекокатолїцкей парохиї св. Петра и Павла, видрукована кнїжка новосадского пароха о. др Романа Миза Нашо християнски обовязки, хтору автор пошвецел шицким младим християнским фамелийом.
2023 – Дружтво за руски язик, литературу и културу отримало Округли стол з нагоди значного ювилея – 100-рочнїци обявйованя „Граматики бачваньско-рускей бешеди” др Гавриїла Костельника (РНПД, Сримски Карловци 1923). Округли стол бул перша подїя отримана у нових просторийох Заводу за културу войводянских Руснацох, хтори урядово отворени 6. юния 2023. року.
Шветови дзень шерца (World Heart Day), хтори запровадзела Шветова федерация за шерцо и означує ше од 2000. року.
Шветови дзень гускох (National Goose Day), означує ше од 1973. року у Мифлину у ЗАД же би ше спозорело же гуски загрожена файта на червеней лїстини защицених файтох птицох.