6. ЮНИЙ – Нa нєшкайши дзень народзели ше архитекта Павле Жилник и културни дїяч Миломир Шайтош.
1799 – Народзени писатель Александер Серґеєвич Пушкин (Москва, 6. юний 1799 – Санкт Петербурґ, 10. фебруар 1837).
1875 – Народзени писатель Томас Ман (Либек, 6. юний 1875 – Цирих, 12. авґуст 1855). Писал романи, приповедки, добитнїк є Нобеловей награди за литературу 1929. року.
1919 – Народзел ше учитель, наставнїк, уметнїцки руководитель, композитор и хореоґраф, Юрий Цимбора (Свиднїк, Словацка, 6. юния 1919 – Прешов, Словацка, 1. октобер 1989). Бул уметнїцки руководитель, дириґент Поддуклянского українского народного ансамбла (ПУНА). Юрий Цимбора записовал фолклорни мелодиї, компоновал, писал музику за нови танци. Позберал и записал вецей як 1000 руски народни шпиванки и видал векше число зборнїкох обробених руских народних писньох за потреби аматерских хорох. Зоз орґанизаторами Червеней ружи сотрудзовал од 1967. року, дзекуюци Дюрови Варґови, котри ше з нїм дописовал, Юрий Цимбора од 1970. по 1979. рок зложел и вецей композициї на тексти наших авторох. Умар у Прешове 1. октобра 1989. року.
1920 – Народзел ше архитекта Павле Жилник(Нови Сад, 6. юний 1920 – Нови Сад, 20. октобер 2006). Основне и стреднє образованє здобул у Новим Садзе, студиї архитектури започал у Беоґрадзе, алє абсолвовал у Будапешту на Архитектонским одсеку Технїчного Универзитету, а дипломовал 1949. року у Беоґрадзе. Павле Жилник почал робиц у Оддзелєню за будинки АП Войводини, концом 1977. року є вибрани за доцента Академиї уметносцох у Новим Садзе дзе робел як позарядови професор одкадз пошол до пензиї 1991. року. Проєктовал ресторани на Ириґским венцу, у Каменїцким парку и на новосадским Рибарцу. Автор є проєкта СтудиоМ, будинкох НВУ Форум и новосадского Дневника, НВУ Руске слово у Руским Керестуре. Проєктовал и задружни доми у Вербаше и Тителу, Ґинеколоґийну клинїку у Новим Садзе, ентериєр Малей и Велькей сали Скупштини Войводини, будинки основних школох у Коцуре, Сенти, Томашевцу, Беочину, автор є архитектонских ришеньох радио релейох на Червеним и Чарним Чоту, церквох у Ґосподїнцох и Лишнї. Добитнїк є вецей дружтвених припознаньох: Октоберска награда городу Нови Сад за 1966. рок, а перши є добитнїк Табаковичевей награди котру додзелює Дружтво архитектох Нового Саду.
1960 – Народзел ше културни дїяч Миломир Шайтош (Нови Сад, 6. юний 1960 – Нови Сад, 20. юлий 2025). Фахове музичне образованє здобул у нїзшей и стреднєй музичней школи Исидор Баїч у Новим Садзе, як и на Музичней академиї новосадскей Академиї уметносцох. Миломир Шайтош робел у Радио Новим Садзе з претаргнуцами од 1977. по 1986. рок на музичних емисийох Одгуки з ровнїни и Мелодром. Миломир Шайтош ше познєйше вишколовал за програмера, та робел у самостойней аґенциї Compy Soft, и у компанийох Юґоинспект и Електровойводина одкаль и пошол до пензиї. Бул танєчнїк ище у КУД Максим Горки, а потим и хореоґраф у Руским културним центру зоз Нового Саду и у КПД Дюра Киш зоз Шиду. Поставел коло 15 авторски хореоґрафиї. Написал даскельо статї зоз обласци руского фолклору и фолклористики. Як предсидатель Конґресней комисиї за културу Шветового Конґреса РРЛ сотрудзовал зоз хореоґрафами руских фолклорних ансамблох Горнїци. У єдним мандату бул предсидатель УО Заводу за културу войводянских Руснацох, член Совиту за национални меншини и член Совиту за младих Городу Нового Саду. У вецей мандатох бул член Националного совиту Руснацох, бул заменїк предсидателя Рускей матки и предсидатель Новосадского городского одбору РМ и член УО Дружтва Руснацох Нового Саду – Войводини. Миломир Шайтош ше упокоєл 20. юлия 2025. року и спочива на Городским теметове у Новим Садзе.
1984 – Патентовани Тетрис, єдно з найпопуларнєйших лоґичних видео-бавискох. Бависко направел науковец Алексей Пажитнов. Мено тетрис походзи од греческого префиксу tetra- (штири), понеже шицки часци составени од штирох сеґментох и тениса (спортского бависка).
2023 – Урядово отворени просториї Заводу за културу Войводянских Руснацох на адреси Матици сербскей 15 у Новим Садзе. Просториї отворели предсидатель Покраїнскей влади Иґор Мирович и предсидатель Националного совиту Руснацох Йоаким Рац, а присуствовали и покраїнска секретарка за културу и информованє Драґана Милошевич, представителє других националних совитох и заводох за културу, дїяче…