БЕОҐРАД – Зоз слоґаном „Авантура почина ту!” на Беоґрадским сайму од нєшка 22. по нєдзелю 25. фебруар у галох 1, 1А и 4, будзе отримана найзначнєйша туристична манифестация цалого реґиону юговосточней Европи и других часцох швета – 45. Медзинародни саям туризма.
Туристична орґанизация општини Вербас (ТООВ) представи шицки потенцияли Општини Вербас на тей престижней манифестациї и поволує шицких же би пришли на єй штанд у гали 4 и упознали ше зоз туристичним понуканьом вербаскей општини.
На соботу, 24. фебруара, на штанду Покраїнского секретарияту за привреду и туризем будзе представена манифестация „Капушнїк фест” з Коцура.
Жем партнер Сайму туризма того року Република Греческа. Перши раз на Сайму туризма наступаю Камбоджа, Еквадор, Свята Луция и Либия, а свой приход наявели и Индонезия, Куба и Сао Томе и Принципе.
Традиционално, на Сайму буду участвовац найзначнєйши туристични аґенциї, здруженя и орґанизациї, готели, туристични центри, транспортни компаниї и медзинародни тур-оператере.
Сербия шицки свойо туристични адути представи у гали 4 Беоґрадского сайму през наступи Туристичней орґанизациї Сербиї (ТОС), Туристичней орґанизациї Беоґраду (ТОБ), Туристичней орґанизациї Войводини (ТОВ), як и числених локалних и реґионалних туристичних орґанизацийох зоз шицких часцох Сербиї. У галох 1А и 1 замерковани наступ буду мац Ґаранцийски фонд АП Войводини и Покраїнски секретарият за привреду и туризем.
Роботни час Сайму туризма и Сайму ХОРЕKА-ОПРЕМА од штвартку по соботу од 10 по 19 годзин, и на нєдзелю од 10 по 18 годзин.
