ОПШТИНА ШИД – На швето святого велькомученїка Георгия, у народзе познатше як Дзуря, вчера, 6. мая у грекокатолїцких церквох у општини Шид служени Служби Божо.
У церкви Преображеня Господнього у Шидзе Службу Божу служел парох о. Михайло Режак, а потим одслужел и Молебен до Пречистей Дїви Мариї.
После Молебена, шлїдзел обряд пошвецаня жита, а молитви и обряд того року були у загради Лєтней владическей резиденциї (до тераз були у церковней порти) прето же там вєшенї пошал жито Златко Манько зоз Шиду, хтори и обрабя тоту заграду. З тей нагоди о. Режак наглашел же молитви и пошвецанє нє лєм за добри урожай жита, алє и за шицки други рошлїни и плоди хтори ше продукує.
У Церкви собору святого архангела Михаила у Беркасове Службу Божу служел и жито пошвецел парох о. Владимир Еделински Миколка як и у церкви Успеня Пресвятей Богородици у Бикичу дзе тиж була Служба Божа и пошевцанє жита.
Шветочно було и у Церкви святого апостола и евангелисти Луки у Бачинцох дзе Службу Божу служел и потим пошвецел жито парох о. Юлиян Рац.
