НОВИ САД – На Продуктней берзи Нови Сад у остатнїм тижню, прешлого 2024. року, пре швета ше менєй тарґовело. Вкупни обток бул 1.547 тони роби, а його финансийна вредносц була 45.582.320 динари, пише у сообщеню.
Найвецей ше предавало кукурицу и вона забера 68% обтоку. Кукурица и соя були драгши, а жито було туньше як тидзень пред тим. Предавало ше кукурицу з анализу на афлатоксин од 19,80 по 20,20 дин/кг без ПДВ-a у зависносци од паритетох, а то за 1,64% вецей у одношеню на тидзень пред тим.
Пондерована цена кукурици досцигла 20,02 дин/кг без ПДВ-a (22,02 дин/кг з ПДВ-oм). У истим периодзе 2023. року єй пондерована цена була 17,92 дин/кг без ПДВ-a, цо за 11,72% менєй од тей цени хтора була у остатнїм тижню у 2024. року.
Жито ше менєй предавало, берзански контракти заключовани од 22,50 по 23,50 дин/кг без ПДВ-a у зависносци од параметрох квалитета и паритетох. Пондерована цена була 23,00 дин/кг без ПДВ-a (25,30 дин/кг з ПДВ-oм), а у одношеню на тидзень пред тим то менєй за 0,95%.
За сою склопени лєм єден корпоративни контракт по 54,50дин/кг без ПДВ-a (59,95 дин/кг з ПДВ-oм) з обраховйованьом квалитета и то була пондерована цена. То за 1,49% вецей у одношеню на тидзень пред тим. Олєйови репчень ше предавало по 56,92 дин/кг без ПДВ-a (485 €/т без ПДВ-a).
Од минералних гнойох ше найвецей предавало гной УРЕА, ґрануловани, од 45,76 пo 46,35 дин/кг без ПДВ-a (390 пo 395 €/т без ПДВ-a) у зависносци од пакованя. Заключени и контракт за гной УРЕА, приловани, (векши ґранули) на паритету ЦПТ купец по 44,77 дин/кг без ПДВ-a (380 €/т без ПДВ-a).