СЕРБИЯ – Нєшка, 15. фебруара, Дзень державносци Сербиї, означує ше як здогадованє на дзень кед 1804. року у Орашцу почало Перше сербске повстанє за ошлєбодзенє од Туркох, як и на преглашенє першого Уставу Сербиї, тиж 15. фебруара 1835. року на Скупштини у Краґуєвцу, так же то источашнє и Дзень уставносци Сербиї.
Понеже 15. фебруар и церковне швето Стритениє господнє по юлиянским календаре, спомнути устав познати и як Стритенски устав.
Тот датум ше як Дзень державносци у Сербиї славело по наставанє Кральовини Сербох, Горватох и Словенцох, а одлуку же би 15. фебруар, на Стритениє, ознова бул Дзень державносци, Народна скупштина Сербиї принєсла 10. юлия 2001. року.
Дзень державносци ше слави два днї, а понеже други дзень швета нєдзеля и пондзелок будзе нєроботни. По календаре нєроботних дньох у Републики Сербиї Дзень державносци ше слави од соботи 15. по пондзелок 17. фебруара.
Пре нєроботни днї, нови информациї на Рутенпресу буду на вовторок, 18. фебруара.