РУСКИ КЕРЕСТУР – Дзень побиди над фашизмом и його 80-рочнїца у Руским Керестуре означени штварток 8. мая у центре валала при памятнїку погинутим борцом у Другей шветовей войни.
З тей нагоди положени спомин-плочи погинутим русийским пилотом Червеней армиї Андрейови Афанасєвичови Харченкови (1914 – 5. новембер 1944), Василийови Антоновичови Кожевнїкови (1922 – 5. новембер 1944), Иванови Ивановичови Иваненкови (1921 – 5. новембер 1944). Шицки троме були борци 17. воздушеней армиї, 3. українского фронта, а погинули 5. новембра 1944. року у Руским Керестуре.
Окрем спомин плочох, на керестурским теметове обновени и їх памятнїк за цо ше остарал Славо Дудаш и Здруженє борцох Месна орґанизация Руски Керестур.
На истим месце у парку при памятнїку погинутим борцом у Другей шветовей войни положена и спомин плоча погинутим Руснацом 1992. року – Ромкови Олеярови, Дюрови Джуджарови, Звонкови Гардийови, а мено Славка Афича будзе накнадно написане.
На подїї були вельочислени жителе, школяре зоз керестурскей школи, члени Здруженя борцох, борецких орґанизацийох зоз Беоґраду и Нового Саду и домашнї погинутих борцох.
