РУСКИ КЕРЕСТУР – У основней и штреднєй школи „Петро Кузмяк” означени Дзень мацеринского язика зоз презентацию докторскей дисертациї доцента др Александра Мудрия „Терминолоґия у вязи зоз хованьом домашнїх животиньох у язику войводянских Руснацох (коґнитивно-линґвистични аспект)” зоз Оддзелєня за русинистику Филозофского факултету у Новим Садзе, за котру нєдавно достал награду CERM 2023 Центра за виглєдованє меншинох Универзитету Инсубриа у Италиї.
На годзини пошвеценей мацеринскому язику, Мудри присутним школяром представел найинтересантнєйши часци свойого виглєдованя, а школяром окреме були цикави фразеолоґизми котри обробени у роботи.
Годзину орґанизовали домашнї професорки руского язика Каролина Джуджар, Люпка Малацко и Тамара Хома, спред Активу наставнїкох руского язика.
Присуствовали школяре од шестей по осму класу основней школи, и ґимназиялци руских оддзелєньох.