РУСКИ КЕРЕСТУР – З нагоди Дня ошлєбодзеня Руского Керестура у Другей шветовей войни, внєдзелю, 22. октобра домашнє Здруженє спортских рибарох (ЗСР) „Коляк” орґанизовало уж шеснасте традицийне змаганє у спортским рибалову „Чукияду”.
На тогорочней Чукияди, по слунечней и вигодней хвилї за лапанє риби, змагали ше дзеветнац учашнїки. Медзи учашнїками векшина була члени ЗСР „Коляк” з валалу.
Перше место завжал Михайло Костелник з влапену єдну чуку чежини 730 ґрами, друге место Желько Кнежевич зоз тиж влапену єдну чуку чежини 685 ґрами, док треце место завжал Желько Жирош, чий улов була єдна чука, чежини 605 ґрами.
За чашнїкох и своїх членох ЗСР „Коляк” по законченю штирогодзинового змаганя орґанизовал полудзенок и друженє, а капусту у котлу приготовел кухар Михайло Орос Лаци.
Змаганє отримане на часци беґелю од моста по базен на новей писти, лапало ше на дуґов, без балерини и могло ше лапац на три циґонї, док ше зоз штвартим могло лапац рибки (кедери). На тогорочним змаганю у спортским рибалову „Чукияди” вкупно лапени лєм пейц фалати чуки, котри мож повесц же були менши прикладнїки и чежели лєм до єдней кили.
Од тогорочних учашнїкох на змаганю дознаваме же у наших водох єст и чуки котри чежа и до три килоґрами, алє нажаль и на тогорочней Чукияди нашим змагательом ше нє поспишело вицагнуц даяки векши прикладнїк.
Права сезона риболову на чуку почина аж теди кед захладнє, док приду и перши мрази.
