ВУКОВАР (ГОРВАТСКА) – У шветочней сали Роял всоботу, 25. януара отримани 59. Вечар Руснацох „Бал” городу Вуковару.
На початку, зоз пригоднима словами присутних привитала предсидателька Союзу Русинох Републики Горватскей Дубравка Рашлянин, а потим слово превжал подпредсидатель Горватского собору и городоначальнїк городу Вуковару Иван Пенава котри преглашел 59. Вечар Руснацох отворени.
Вечар предлужени зоз културно-уметнїцку програму домашнього КУД Осиф Костелник и госцох зоз КУД Яким Гарди Петровци, а вони ше представели зоз хлопску шпивацку и танєчну ґрупу. После културней програми ушлїдзела вечера зоз танцом, а за музику и веселу атмосферу бул задлужени Пицикато бенд.
Того року нє була отримана томбола, алє ше танвоцало традицийни Танєц шерца, були преглашени и побиднїки. Друге и треце место достали по фляшу вина, а за перших преглашени Яка Колбас зоз Винковцох и Неделько Йокич зоз Сотину, як награду обидвойо достали чоколадову торту.
На Балє було коло 150 особи, а пришли зоз цалей Горватскей, зоз Задру, Заґреба, Осиєку, Винковцох, Вуковару, Петровцох и Миклошевцох, а було госцох и зоз Сербиї, зоз Бачинцох.
Орґанизатор вечара – Союз Русинох Републики Горватскей и КУД Осиф Костелник Вуковар, а финансийно го потримали город Вуковар и Совит за национални меншини Републики Горватскей.
