КОЦУР – У просторийох оддзелєня Явней библиотеки „Данило Киш” у Коцуре вовторок, 14. фебруара, отримани поетски вечар наволани „За погар любови”. У орґанизациї КПД ДОК – НС, вечар поезиї бул пошвецени св. Трифунови и св. Валентинови.
На початку, предсидатель Дружтва проф. др Михайло Фейса привитал присутних зоз пар словами, а потим читани и стихи поетских креацийох котри сцигли на розписани конкурс з нагоди означованя того швета.
Одволали ше вецей авторе, а преглашени и лауреатки/лауреати поетского конкурсу. У текстох по руски лауреатки Адрияна Фейди и Лїляна Костелник з Руского Керестура, а у текстох по сербски Мария Драґович з Коцура и Милад Обренович з Роґатици. Шицки лауреати достаню и пригодни дарунки, гварел др Фейса.
Стихи того вечара читали, окрем др Фейси, Весна Пешут Радошевич и Мария Горняк, а свою поезию присутним представели и Мария Драґович и Славимир Шанта. Присутни з аплаузом наградзели кажду писню на тему любови гуторену з тей нагоди.
По словох др Фейси, учашнїкох було коло петнац, шесцеро представели свойо твори по руски, булa и єдна учашнїца з Лондону, и конкурс бул успишни. Як наявел, планує же би ше коло 30 писнї з тогорочного конкурсу и коло 30 зоз прешлорочного обєдинєло до єдного зборнїку, за чийо видаванє, по його думаню, потребне коло 50, 60 тисячи динари.
