ДЮРДЬОВ/ҐОСПОДЇНЦИ – Националне швето Руснацох у Републики Сербиї будзе означене ютре, 17. януара, у Дюрдьове и у Ґосподїнцох.
У просторийох Културно-уметнїцкого дружтва „Тарас Шевченко”, традицийно на 12 годзин, почнє шветочна програма, а пред тим буду положени три застави на трох значних местох за Руснацох и валал. Перше на будинку Месней заєднїци, потим на Рускей школи, а на концу и на КУД „Тарас Шевченко”.
У святочней програми у Дружтве буду участвовац члени секцийох КУД „Тарас Шевченко”, а на програми будзе пречитана и кратка история Руснацох, од приселєня по значни подїї и датуми.
У Ґосподїнцох святочна програма почнє на 14 годзин у просторийох Месней заєднїци Ґосподїнци.
Означованє Националного швета Руснацох у Републики Сербиї у Дюрдьове и Ґосподїнцох орґанизовала Подручна канцелария Националного совиту Руснацох Дюрдьов.